«Amanat» saılaýǵa baqylaý jasaıdy

NUR-SULTAN. QazAqparat - Qazaqstanda «Amanat» azamattyq alańy quryldy. Atalǵan bastamanyń negizgi maqsaty - saılaý úderisine qoǵamdyq monıtorıng júrgizý. Ashyq ári ádil saılaýǵa múddeli Qazaqstan azamattarynyń erikti birlestigine qoǵamdyq uıymdar, BAQ ókilderi, jastar, sarapshylar men azamattyq belsendiler kirip otyr, dep habarlaıdy QazAqparat tilshisi.

Búginde «Amanat» alańynyń qoǵamdyq shtaby quryldy. Al onyń jumysyna qatysty sarapshylardyń tarapynan 250-den astam usynys tústi. Sonyń negizinde ózekti degen máseleler iriktelip, jumys júrgizýdiń naqty 5 baǵyty aıqyndaldy. Birinshi baǵyt boıynsha saılaýdyń daıyndyq sharalaryna baqylaý jasalady. Sebebi zańǵa sáıkes, árbir azamattyń saılaýǵa qatysýǵa quqyǵy bar. Ol úshin barlyq qajetti jaǵdaılar ýaqtyly jasalýy qajet.
«Qazirgi kezde qoǵamda saılaý nýqanyna qatysty saıası belsendilik artyp keledi. Saılaý qalaı ótedi? Barlyǵy qanshalyqty zańdy ári ashyq bolady? Azamattar óz quqyqtaryn qalaı iske asyrady? Barlyǵy birdeı óz quqyqtaryn iske asyra ma? Qoǵam tarapynan osy máselelerge baqylaý bolsa eken degen maqsatymyz bar. Kemshilik bolsa, biz aıtaıyq. Barlyq oblystardy qarap shyqtyq. Qoldaý bar. «Amanattyń» bes baǵyty belgilendi. Osy bes baǵyt oryndalsa, saılaýdyń ádil ári ashyq ótýine jaǵdaı jasalady degen pikir bar» , - deıdi qoǵam qaıratkeri Murat Ábenov.

«Amanattyń» ekinshi baǵyty - saılaýshylardyń quqyqtary týraly aqparatty jan-jaqty taratý. Sonyń ishinde saılaýshylardyń quqyqtyq protsedýralary, saılaý kezeńderi men merzimderi, kandıdatty qoldaý, onyń baǵdarlamasy týraly aqparatty alý jáne taǵy basqa máseleler bar. Budan bólek, sarapshylar saılaýshylardyń quqyqtary buzylsa, ol týraly qaıda jáne qalaı habarlaýǵa bolatynyn túsindiredi. Onlaın zańgerlik keńes berý qyzmeti de bolady.

Úshinshi baǵyt - adaldyq. Ol úshin Qazaqstannyń barlyq óńirlerinde, árbir saılaý ýchaskesinde táýelsiz baqylaý jelisin qurý josparlanǵan. Quqyq buzýshylyq faktileri boıynsha jedel aqparat almasý júıesi bolady. Tórtinshi baǵyt - ashyqtyq. Sonyń aıasynda táýelsiz dıalog platformalary men pikirtalas alańdaryn qurý josparlanyp otyr. Osy sharalarǵa sarapshylar keńinen tartylady. Qoǵamdyq talqylaýlar onlaın rejimde de uıymdastyrylady. Negizgi maqsat - ashyq jáne obektıvti aqparat taratý. Al besinshi baǵytqa sáıkes, qoǵam men memleket arasyndaǵy teń yntymaqtastyqty qurý josparlanǵan. «Amanat» azamattyq tuǵyrnamasy atalǵan bes baǵytqa negizdeledi.

Osy bastamanyń aıasynda barlyq baǵyttar boıynsha halyqaralyq uıymdarmen, Ortalyq saılaý komıssııasymen, jergilikti saılaý komıssııalarymen, Joǵarǵy sotpen, jergilikti atqarýshy organdarmen, Bas prokýratýramen, kandıdattardyń saılaý shtabtarymen, buqaralyq aqparat quraldarymen, ǵylymı-saraptamalyq qoǵamdastyq jáne azamattyq sektor ókilderimen áriptestik baılanystary ornatylady. Barlyq óńirlerde «Amanat» azamattyq platformasynyń ókilderi bolady.