Amanat partııasy janynan «Talqylaý» dıalog alańy qurylady

NUR-SULTAN. QazAqparat – «Amanat» partııasy janynan «Talqylaý» dıalog alańy qurylady. Bul týraly partııanyń qoǵamdyq saıasat ınstıtýty saıası taldaý bóliminiń basshysy Dáýren Bazarov aıtty, dep habarlaıdy QazAqparat tilshisi.

«Keıingi jyldary bizde dıalog alańdary, pikirtalastar qarqyndy damyp keledi. Onda eldiń, sondaı-aq jaqyn ornalasqan shet memleketterdiń ózekti, qoǵamdyq-saıası máseleleri talqylanyp jatyr. Partııa janynda Nur Otan Trends dıalog, pikirtalas alańy jumys isteıdi. Ol jerde de osy máseleler talqylanady. Keshe partııa tóraǵasy, Memleket basshysy búkil pikirtalastar, talqylaýlar áleýmettik jelide emes, Parlament qabyrǵasynda talqylanyp, ózekti degen problemalardyń jaýaby tabylýy kerek ekenin atap ótti. Partııa osy baǵytta jumys isteıdi. Ol úshin «Talqylaý» dıalog alańy qurylady. Sarapshylar, sonyń ishinde sheteldik sarapshylar elimizdiń ózekti máselelerin sheshýge qatysady», - dedi Dáýren Bazarov QazAqparattyń suhbat alańynda.

Partııa ókili «Amanat» Prezıdent Qasym-Jomart Toqaev aıtqandaı, óziniń keleshgi úshin halyqtan tyń ıdeıalar qabyldap, barynsha ashyq jumys isteýge bekinip otyrǵanyn aıtyp sendirdi.