Altyn tobylǵy: Úzdik ádebı shyǵarmalardyń avtorlary marapattaldy
Nazarbaev ortalyǵynda V «Altyn tobylǵy» ádebı baıqaýynyń jeńimpazdaryn marapattaý rásimi ótti.
«QR Tuńǵysh Prezıdenti - Elbasynyń Qory bul baıqaýdy jyl saıyn 18 ben 35 jas aralyǵyndaǵy jas aqyn-jazýshylar arasynda ótkizedi. Joba qazirgi zaman ádebıetine qyzyǵýshylyqty arttyryp, jastardyń shyǵarmashylyǵyn shyńdaýǵa baǵyttalǵan. Jyl saıyn baıqaýǵa qyzyǵýshylyq artyp keledi. Bıyl 170 jumys usynyldy, al 2015 jyly 120 jumys tapsyrylǵan bolatyn» delingen habarlamada.
Úzdik shyǵarmalar «Jyldyń úzdik prozasy», «Jyldyń úzdik poezııasy», «Jyldyń úzdik balalarǵa arnalǵan shyǵarmasy», «Jyldyń úzdik dramatýrgııasy» jáne Jastar jylyna arnalǵan arnaıy júlde «Uly dalanyń jasampaz urpaǵy» atty bes nomınatsııa boıynsha anyqtaldy.
Qazylar alqasynyń quramyndaǵy elimizdiń belgili mádenı qaıratkerleri, jýrnalıster men jazýshylar usynylǵan jumystardy baǵalap, shyǵarmanyń kórkemdik stılin, emotsıonaldy jáne estetıkalyq áserdiń tereńdigin, avtorlar oıynyń júıeliligin, ıdeıasynyń ózindik ereksheligin baǵalady.
Marapattaý rásiminde QR Tuńǵysh Prezıdenti-Elbasy Qorynyń atqarýshy dırektory Áset Isekeshev baıqaýdy qorytyndylap, jastarǵa tilegin jetkizdi: «Búgin biz júzden júırik, myńnan tulpar shyqqan jeńimpazdardy marapattaımyz. Elbasy Nursultan Ábishuly Nazarbaev «Bolashaqqa baǵdar: Rýhanı jańǵyrý» maqalasynda «Salt-dástúrlerimiz, ádebıetimiz, ulttyq rýhymyz boıymyzda máńgi qalýǵa tıis» degen edi. «Uly Dalanyń jeti qyry» maqalasynda da Elbasy rýhanııatqa kóp kóńil bóldi. Uly halyqty ózderińizdeı talantty urpaǵy jasaıdy. Búginde elimizde daryndy jastarǵa qoldaý myqty. Elbasy Qory qashanda shyǵarmashyl jastardy qoldap, túrli baıqaýlardy úzdiksiz ótkizýde. Aldaǵy ýaqytta da Qor bul jumysty jalǵastyrady. Sizderge shyǵarmashylyq shabyt tileımin! Qazaq kórkem sóz óneriniń sheberleri kóbeıe bersin!».
Úzdik shyǵarmalardyń avtorlaryn Áset Isekeshev, QR Parlamentiniń depýtattary, kórnekti qoǵam qaıratkerleri, mádenıet jáne óner qaıratkerleri marapattady.
«Altyn tobylǵy» baıqaýynyń jeńimpazdary:
- «Jyldyń úzdik prozasy» nomınatsııasy - Qanat Ábilqaıyr, Doshan Jylqybaı;
- «Jyldyń úzdik balalarǵa arnalǵan shyǵarmasy» - Marat Seıilhanov, Asylan Tilegen, Mıras Asan.
Joǵaryda atalǵan jeńimpazdardyń árqaısysy 1 mıllıon teńgeden aldy.
Júlde qory 2 mıllıon teńgelik «Jyldyń úzdik poezııasy» jáne «Jyldyń úzdik dramasy» nomınatsııalarynyń jeńimpazdary - Bekzat Smadııarov pen Arshyn Nurbaqov.
«Uly dalanyń jasampaz urpaǵy» nomınatsııasyn Nurtas Turǵanbek jeńip aldy. Oǵan 3 mıllıon teńgeniń sertıfıkaty tapsyryldy.
