Alty oblysty toń basyp jatyr

ASTANA. QazAqparat – Elimizdiń alty oblysynda topyraqtyń qatýy 84 santımetrge deıin jetedi. Bul týraly Ekologııa jáne tabıǵı resýrstar vıtse-mınıstri Ǵalıdolla Azıdýllın aıtty, dep habarlaıdy QazAqparat tilshisi.

«Topyraqtyń qatý tereńdigi Aqmola, Qostanaı, Qaraǵandy, Batys Qazaqstan, Atyraý jáne Aqtóbe oblystarynda ótken jylǵy kórsetkishterden orta eseppen 4-ten 84 sm-ge deıin joǵary. Qaraǵandy, Aqmola, Soltústik Qazaqstan jáne Qostanaı oblystarynda ótken jylǵy kórsetkishterden orta eseppen 7-den 40 sm-ge deıin tómen. Joǵaryda atalǵan faktorlardy eskere otyryp, aqpan men naýryz aılarynda temperatýranyń kúrt kóterilýi jáne qatty jańbyr bolǵan jaǵdaıda erigen qar-jańbyrly sý tasqyny paıda bolýy múmkin», - dedi ol Ortalyq kommýnıkatsııalar qyzmetindegi baspasóz máslıhatynda.

Ǵalıdolla Azıdýllınniń aıtýynsha, aldyn ala boljamǵa sáıkes, aqpan aıynda respýblıkanyń basym bóliginde aýa temperatýrasy klımattyq normaǵa jaqyn, Qazaqstannyń qıyr ońtústiginde normadan 1°S joǵary bolady dep boljanady.

«Aqpan aıynda jaýyn-shashyn mólsheri respýblıkanyń basym bóliginde normaǵa jýyq, Atyraý, Mańǵystaý, Batys Qazaqstannyń basym bóliginde, Aqtóbe jáne Qostanaı oblysynyń batysynda normadan az, Túrkistan, Qyzylorda oblysynyń basym bóliginde, Jambyl oblysy, Almaty oblysynyń ońtústik jartysynda, Jetisý oblysynda normadan kóp dep boljanady», - dedi vıtse-mınıstr.

Foto: pxhere.com