«Altynalmas AK» kompanııasy «Maıqaıyńaltyndy» satyp alý protsesin aıaqtady

PAVLODAR. KAZINFORM — «Altynalmas AK» AQ «Rense Enterprises Limited»-ke tıesili bolǵan «Maıqaıyńaltyn» AQ-nyń jarǵylyq kapıtalyndaǵy 100% úlesin satyp alý mámilesin sátti aıaqtady. 

Kásiporynnyń «Altynalmas» kompanııalar tobyna qosylýy onyń turaqty damýyn qamtamasyz etip, ónerkásiptik qaýipsizdik deńgeıin arttyrady jáne taý-ken óndirisin tıimdi jalǵastyrýǵa jaǵdaı jasaıdy dep kútilip otyr.

Byltyr sáýir aıynda «Maıqaıyńaltyn» AQ aktsıonerleri men «Altynalmas AK» AQ arasynda kelisim ornaǵannan keıin kásiporynǵa «Altynalmas» tobynyń joǵary bilikti mamandary tartylǵany málim. Olardyń basty mindeti — apat saldaryn joıý, óndiristik qýattylyqtardy qalpyna keltirý, ınfraqurylymdy jańǵyrtý jáne barlyq protsesterdi joǵary qaýipsizdik standarttaryna sáıkestendirý boldy. 

— 2024 jyldyń tamyz aıynda kásiporynda qurylys-jóndeý jumystary bastaldy, al qazan aıynda «Maıqaıyńaltyn» AQ kenorny qyzmetin qaıta jandandyryp, qarasha aıyna qaraı josparlanǵan kórsetkishterge qol jetkizdi. Buǵan qosa, beton toltyrmalaý kesheni iske qosylyp, qyzmetkerlerdiń ákimshilik-turmystyq jaǵdaılaryn jaqsartý boıynsha jumystar júrgizilýde. Keleshekte óndiristi odan ári jańǵyrtý jáne eńbek tıimdiligi men qaýipsizdigin arttyrýǵa baǵyttalǵan ınnovatsııalyq tehnologııalardy engizý josparlanýda. Qazirgi ýaqytta kásiporynda ónerkásiptik qaýipsizdik deńgeıin arttyrý, óndiristik áleýetti damytý, sondaı-aq qyzmetkerlerdiń eńbek jaǵdaılaryn jaqsartý jáne áleýmettik qoldaý sharalaryn iske asyrý boıynsha jumystar júrgizilýde. Búginde kompanııa qyzmetkerleriniń 95%-y — aımaqtyń jergilikti turǵyndary, - dep habarlady «Altynalmas AK» kompanııasynan.

Eske sala keteıik, 2024 jylǵy 4 qańtarda Pavlodar oblysyndaǵy Maıqaıyń altyn kenishinde ishinde adamdar bar avtobýs jer astyna túsip ketti. 

Apat bolǵan kúni oqıǵa ornynan eki qutqarýshynyń múrdesi tabyldy.  

Keıin qutqarýshylar topyraqtyń jıi qozǵalýyna baılanysty jerdi qazý jumystaryn toqtatty. 

Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy.  

19 shildede Maıqaıyńda alty aıdan soń úshinshi qutqarýshynyń múrdesi tabylǵan edi. 

25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy.  

Keıin Elorda soty qutqarýshylardyń ólimine jumys berýshi tarap kináli dep tanydy. 

Opat bolǵan bir qutqarýshynyń otbasy jumys berýshiden 120 mln teńge óndirip aldy. 

Qyrkúıek aıynda kenishtegi apatqa kináli retinde 6 adam qamaýǵa alynǵany týraly jazǵan edik. 

Kúdiktiler keıin úıqamaqqa jiberildi. 

Keıin sot «Maıqaıyńaltyn» kenishinde qaza bolǵan qutqarýshynyń isi boıynsha moraldyq ótemaqyny tórt ese kemitti. 

2024 jyldyń sońynda Pavlodar oblysynyń ákimi Maıqaıyńdaǵy apattyq úıler turǵyndaryna jańa baspana salynatynyn málim etti. 

Bıylǵy aqpan aıynda Maıqaıyń kenishindegi apatqa kináli tulǵalardyń alǵashqylaryna úkim shyǵaryldy. 

Al, jaqynda Pavlodar oblysynyń bıligi Maıqaıyńda apatty aımaqta turyp jatqan 273 adam qalaı kóshiretini týraly aldyn ala josparlaryn jarııa etti.