Alty jylda elimizdiń balabaqshalaryna kezek 5 esege azaıdy
ASTANA. KAZINFORM — 2019 jyly elimizde 892 myń bala tárbıelengen 10,5 myń mektepke deıingi uıym jumys istese, 2025 jylǵa qaraı mundaı uıymdardyń sany 1 mlen-nan astam balany qamtı otyryp, 11,8 myńǵa deıin ósti. Bul týraly Úkimettiń baspasóz qyzmeti habarlady.
Bul rette qamtý qýaty az shaǵyn ortalyqtardan turaqty materıaldyq-tehnıkalyq bazasy bar tolyqqandy balabaqshalar ashýǵa kóshýdi atap ótýge bolady.
Kezekke qatysty máselede aıtarlyqtaı ózgerister boldy. 2019 jyly mektepke deıingi orynǵa kezekte 446 176 bala turdy. 2025 jylǵy 1 qańtarda bul kórsetkish 2 jastan 6 jasqa deıingi 84 myń balaǵa deıin qysqardy. Osylaısha, alty jyl ishinde kezek kútkender sany shamamen 5 esege azaıdy. Bul mektepke deıingi mekemeler jelisin júıeli túrde keńeıtý, oryndardy bólýdiń jańa tásilderin engizý jáne vaýcherlik qarjylandyrý sııaqty protsesterdi tsıfrlandyrý arqyly múmkin boldy.
Buryn balabaqshaǵa jazylý rásimi: shamadan tys júktelgen elektrondyq kezek, aýmaqtyq teńgerimsizdik, oryndardy bólýdiń kúmándi shemalary, jalǵan qabyldaý syndy kóptegen qıyndyqtarmen qatar júretin. Bul máseleler ásirese iri qalalarda jáne tez damyp kele jatqan aglomeratsııalarda ótkir kúıde boldy. Búgingi tańda bul qıyndyqtar tsıfrlyq servısterdiń, balalardy esepke alýdy avtomattandyrýdyń jáne memlekettik qyzmetter kórsetýdiń ashyq rásimderin engizýdiń arqasynda birtindep eńserilýde.
Mektepke deıingi salany qarjylandyrýdyń tıimdiligin arttyrýdaǵy negizgi qadam – vaýcherlik júıeni engizý. 2024 jylǵy 9 shildeden bastap Taraz qalasynda derbestendirilgen qarjylandyrýdy eskere otyryp, mektepke deıingi tárbıe men oqytýǵa memlekettik bilim berý tapsyrysyn ornalastyrý boıynsha pılottyq joba bastaldy.
Júıe ata-analarǵa vaýcher – barlyq talaptarǵa sáıkes keletin kez kelgen balabaqshada (memlekettik nemese jeke) paıdalanýǵa bolatyn jeke «sertıfıkat» berýdi kózdeıdi. Bul ata-analardyń tańdaýyn keńeıtedi, uıymdar arasyndaǵy básekelestikke yqpal etedi jáne qyzmet sapasyn jaqsartady. Sonymen qatar júıe qaıtalanýdy jáne jalǵan tizimderdi boldyrmaıdy, bul 27 mlrd teńgeden astam únemdeýge múmkindik berdi.
- Búgingi tańda vaýcherlik júıe 12 qala men 3 aýdanda keńeıtilýde. 2025 jyldyń sońyna deıin joba bekitilgen kestege sáıkes búkil respýblıka boıynsha kezeń-kezeńimen engiziletin bolady.
2024 jyldyń qorytyndysy boıynsha 2 jastan 6 jasqa deıingi balalardyń 93,1%-y mektepke deıingi tárbıemen jáne oqytýmen qamtyldy. 2025 jyly mektepke deıingi, orta, tehnıkalyq jáne kásiptik bilim berýdi damytýdyń 2023-2029 jyldarǵa arnalǵan tujyrymdamasynda kózdelgendeı qamtýdy 95%-ǵa deıin arttyrý, al 2028 jylǵa qaraı – 100%-ǵa jetý josparlanyp otyr. Bul tapsyrma Prezıdenttiń «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy baǵdarlamasyn iske asyrý sheńberinde berildi, - delingen aqparatta.
Osylaısha, Qazaqstan mektepke deıingi bilim berý salasynda turaqty ilgerileýdi kórsetip otyr. Dáıekti reformalar, tsıfrlandyrýǵa súıený, vaýcherlik qarjylandyrýdy engizý jáne qol jetkizýge basymdyqtyń berilýi júıeni tıimdirek ári otbasylardyń qajettilikterine baǵdarlanýyn qamtamasyz etedi.
Aıta keteıik, Sátpaevta jańartylǵan balabaqsha 300-den astam balany mektepke deıingi bilimmen qamtyp otyr.