Altaı aımaǵynda eńkeıgen qarııadan, alty jastaǵy balaǵa deıin shańǵy tebedi
Qart Altaıdyń qarly shyńy, tabıǵaty men saf taza aýasy kez kelgen týrısti ózine baýrap alady. Aımaqta shańǵy sporty óte jaqsy damyǵan. Munda tek spotrshylar ǵana emes, áýesqoı shańǵy tebýshiler de jıi keledi. Bul týraly Ortalyq Azııa BAQ ókilderine arnalǵan baspasóz týry barysynda jergilikti shańǵy kýrort ókilderi aıtty,dep habarlaıdy Kazinform.
"Myna shańǵy kýrortynda kelýshilerge barlyq jaǵdaı jasalǵan. Uzyndyǵy 65 shaqyrym bolatyn 61 syrǵanaý joly bar. Altaıǵa shańǵy tebýge arnaıy keletin týrıstter kóp. Byltyr 18 memleketten keldi. Onyń ishinde Qazaqstan da bar. Shańǵy maýsymy endi ashylyp jatyr, onyń ústine Qazaqstan men Qytaı memleketteri arasynda vızasyz rejıim engizildi. Bıyl Qazaqstannan qystyń osy sport túrimen shuǵyldanatyn týrıster kóptep keledi dep boljanýda", - dedi taý shańǵy kýrortynyń ókili Shy Jı Go.
Alpys jastaǵy Serikbek Kenjehanuly shańǵyny alty jasynan bastap tebedi. Kishkentaı kezinde jotadan syrǵanap úırengen ol búginde shańǵymen kúnine 15-20 shyqyrym jerdi júrip ótedi.
"Altaı aımaǵynda shańǵy teppeıtin adam joq. Eńbektegen baladan, eńkeıgen qarııaǵa deıin shańǵy tebýdi jaqsy meńgergen. Altaılyq balalardyń oıyny osy - shańǵy. Aımaqtyń aty aıtyp turǵandaı, bizde alty aı qys bolady. Alǵashqy qar qazannyń sońynda túsip, mamyrǵa qaraı erıdi", - deıdi ol.
Aıtýynsha,shańǵy - adam densaýlyǵyna eń paıdaly sport túriniń biri.
"Densaýlyqqa óte paıdaly. Osy sportpen shuǵyldanǵan adam aýyrmaıdy. Ony nyq senimmen aıta alamyn. Mysaly, meni dárigerge qazir aparsańyz da bolady. Eshqandaı dert tappaıdy", - deıdi ol.
Altaı aımaǵynda tórt taý shańǵy kýrorty bar. Sonyń biri - Altaı qalasynyń mańynda ornalasqan halyqaralyq Tszıantszıýnshan shańǵy kýrorty. Bul jerge 2022-2023 jylǵy maýsymda 439700 týrıst kelgen. Onyń 244 500-i shańǵyshy.
