Áltaevti prezıdenttikke kandıdat retinde usyný hattamasyn sot jaramsyz dep tanydy

ASTANA. QazAqparat – Astana soty «Muqalmas» respýblıkalyq qoǵamdyq birlestigi otyrysynyń Nurjan Áltaevti prezıdenttik kandıdat etip usyný týraly hattamasyn jaramsyz dep taný týraly talapty qanaǵattandyrdy. Bul týraly Astana qalalyq sotynyń resmı saıty jazdy, dep habarlaıdy QazAqparat tilshisi.

«Astana qalasy «Baıqońyr» aýdanynyń soty respýblıkalyq qoǵamdyq birlestiktiń (RQB) jalpy jınalys hattamasyn jaramsyz dep taný týraly talap-aryzy boıynsha azamattyq isti qarady.

Talapkerler óz talaptaryn 2022 jylǵy 6 qazandaǵy RQB jınalysynyń qorytyndysy boıynsha Á. jáne oǵan jaqyn adamdar RQB-nyń basqa músheleriniń kómegimen birlestik músheleriniń daýys berýiniń beınejazbasyn negizdemege qosa bere otyryp, QR Ortalyq saılaý komıssııasyna tirkeýge óz erkimen Á.-niń kandıdatýrasyn berýge nıettenip, daýys berý qorytyndysy men hattamany burmalap jibergenine negizdedi.

Jaýapker talappen kelispedi jáne talapkerdiń dálelderine qaramastan, RQB músheleriniń jalpy jınalysynyń sheshimimen kópshilik daýyspen Á.-ni RQB atynan usyný týraly sheshim qabyldandy dep óz ustanymyn talap etti», - dep jazylǵan resmı málimette.

Resmı saıttaǵy málimetke qaraǵanda, respýblıkalyq qoǵamdyq birlestik atynan prezıdenttikke kandıdat usyný kezinde birlestiktiń Jarǵysyna qaıshy áreketter jasalǵan.

«Jarǵynyń 33-tarmaǵyna sáıkes barlyq sheshimder jalpy jınalysqa qatysýshylardyń jalpy sanynyń qarapaıym kópshilik daýsymen qabyldanady.

Jarǵynyń 31-tarmaǵynda, eger onyń jumysyna birlestiktiń óńirlik fılıaldarynyń (ókildikteriniń) jartysynan astamynyń ókilderi qatyssa jáne jınalysqa qatysýshylardyń jalpy sany keminde 40 adamdy qurasa, jalpy jınalys zańdy dep tanylady.

Sotta jalpy jınalysta Á-niń kandıdatýrasyn usynýǵa – 6 adam, qarsy – 11 adam daýys bergeni anyqtaldy.

Osylaısha, jalpy jınalysty ótkizý kezinde RQB músheleriniń kópshiligi kezekten tys prezıdent saılaýynda RQB atynan kandıdat retinde Á-niń usynylýyna «qarsy» daýys berdi.

Sot jalpy jınalys hattamasy RQB Jarǵysynyń 31 jáne 33-tarmaqtarynyń talaptaryna qaıshy keledi jáne shyndyqqa janaspaıdy degen qorytyndyǵa keldi.

Sonymen qatar, jalpy jınalysqa RQB músheleri bolyp tabylmaıtyn jáne daýys berý quqyǵy joq adamdar qatysty jáne daýys berdi», - dep jazady Astana sotynyń saıty.

Eske salsaq, Ortalyq saılaý komıssııasy 7 qazan kúni prezıdenttikke úmitker retinde usynylǵan Nurjan Áltaevtiń qujattary burmalaný faktisine tekserilip jatqanyn málim etken edi.

Al 12 qazanda «Muqalmas» birlestigi Nurjan Áltaevtyń saılaýǵa túsýine qarsylyq bildirip sotqa júgingeni habarlandy.

Foto:astana.sud.kz