Almatynyń Jetisý aýdanynda 5 mlrd teńgege ınvestjobalar júzege asady

ALMATY. QazAqparat - Jetisý aýdanynda quny 5 mlrd 610 myń teńge bolatyn 5 ınvestıtsııalyq joba júzege asady. Bul týraly aýdan ákimi Muhtar Tájibaevtyń halyqpen esepti kezdesýinde aıtyldy, dep habarlaıdy QazAqparat tilshisi.

Byltyr aýdan ekonomıkasyna 45,6 mlrd teńge ınvestıtsııa salynǵan. Al bıyl tartylatyn qarajat 5 ese kóp bolmaq.

«2018 jyly aýdanda jalpy quny 1 mlrd 761 mln teńge bolatyn 6 joba «KBS Engineering» JShS, «Hlebzavod №7» JShS, «Kıslorod Azok» JShS, «Kompanııa Kamerton» JShS, «Adelfı» jáne «Kelet» AQ-ta iske asqan bolatyn. Bıyl quny 5 mlrd 610 mln teńge bolatyn 5 joba júzege asady. Bul jobalar «ASIAPACK» JShS, «Shveınaıa fırma Semıramıda» JShS, «Korporatsııa Derjava» JShS, «Serebroprofit» JShS pen «Nurtaý-A» JShS-larynda iske asatyn bolady», - dedi aýdan ákimi esepti kezdesýinde Muhtar Tájibaev.

Ákimdiktiń baspasóz qyzmetiniń habarlaýynsha, 2018 jyly «Kásipkerlik pen tıimdi jumyspen qamtý» baǵdarlamasy boıynsha 33 kásipker - 516,6 mln teńge kóleminde, 6 kásipker ShOB qarjylandyrý baǵdarlamasy boıynsha 431 mln teńge kóleminde nesıe aldy.

«2015-2019 jyldarǵa arnalǵan Kásipkerlikti qoldaý kartasy» baǵdarlamasy boıynsha 24 kásipker 10 mlrd teńge nesıe alyp, 1600 jumys ornyn qurdy.

Aıta ketý kerek, Jetisý aýdanynda 165 myń adam turady. Munda 46 iri, 117 orta, 6027 shaǵyn kásiporyn jumys istep tur.