Almatynyń jedel járdem qyzmetine jańa kólikter berildi

ALMATY. QazAqparat - Konstıtýtsııa kúni qarsańynda medıtsınalyq jedel járdem qyzmetiniń avtoparki 28 jańa avtomobılmen tolyqty. Kólik kiltterin Almaty ákimi Baqytjan Saǵyntaev tapsyrdy, dep habarlaıdy QazAqparat tilshisi.

Qala ákimi jedel járdem qyzmetiniń ujymyn aldaǵy Konstıtýtsııa kúnimen quttyqtap, densaýlyq saqtaý ákimdik jumysynyń basty baǵyttarynyń biri ekenin atap ótti. Der kezinde medıtsınalyq jedel kómek kórsetý úshin qalada barlyq jaǵdaılardyń jasalatynyn aıtty.

«Medıtsınalyq qyzmetti tehnıkalyq jaryqtandyrý jalǵasatyn bolady. Sonyń ishinde jedel járdem brıgadasy da bar. Bizdiń mindetimiz – jedel járdem dárigerleri úshin barlyq jaǵdaılardy jasaý jáne «altyn ýaqyt» erejesin saqtaý, jedel kómek kórsetý», - dedi B. Saǵyntaev.

Qazirgi kezde jedel járdem qyzmetinde 3874 adam jumys isteıdi. 177 jedel járdem brıgadasy men 265 avtomobıl bar. Qyzmet quramynda 11 qosalqy stantsııa men 3 avtokolonna, 2 avtokólikke maı quıý beketteri jumys isteıdi.

2018 jyly medıkter brıgadasy 1,7 mln shaqyrylymǵa qyzmet kórsetti. Shaqyrylymnyń ortasha sany kúnine - 300. Bıylǵy satyp alynǵan avtomobılder sany kóp. Al, 2017-2018 jyldary jylyna 15-17 kólikten alynatyn.

Barlyq kólikter Densaýlyq saqtaý mınıstrligi jasaǵan standarttarǵa saı jáne zamanaýı quraldarmen jabdyqtalǵan. Olardyń ishinde defıbrıllıatorlar, elektrokardıograftar, ókpeniń jasandy ventılıatsııasynyń apparattary, ottegi ballondary bar.