Almatynyń shalǵaı móltekaýdandaryna ınternet qosylady

ALMATY. QazAqparat – Almatynyń Túriksib aýdanynyń ákimi Baqytjan Aqjarov óńirlik kommýnıkatsııalar qyzmetiniń brıfınginde taıaý ýaqytta Nurshashqan, Álmerek, Qaırat ján Maıak móltekaýdandaryna ınternet qosylatynyn málimdedi, dep habarlaıdy QazAqparat tilshisi.

Aýdan ákimi atap ótkendeı, jergilikti atqarýshy organdar turǵyndardy sapaly ınternetpen qamtamasyz etý boıynsha úlken jumys atqaryp jatyr.

«NLS Kazakhstan kompanııasymen birlesip, Nurshashqan móltekaýdanynyń turǵyndaryn joǵary jyldamdyqty ınternetke qosý jumystary júrgizilip jatyr. Qazirgi ýaqytta 176 abonent qosyldy, kezekte 36 adam tur», - dedi aýdan ákimi.

2021 jyldyń sońyna deıin osy ınternet-provaıder Álmerek jáne Maıak shaǵynaýdandaryna joǵary jyldamdyqty ınternet ótkizý josparlanyp otyr. Qazirgi ýaqytta optıkalyq magıstral qurylysy pysyqtalýda.

Sonymen qatar, «Qazaqtelekom» kompanııasy qyrkúıek aıynda móltekaýdanda ınternet ótkizýdi josparlap otyr. Ol Kóktaý, Taraz, Aqjamal, Arqar, Jaıaý Musa, Sulýshash, Kórimdik 11, 12, 13, 14, 15, 16, 17 kóshelerin, 300-den astam abonentti qamtıtyn bolady. Aıtpaqshy, Qaırat shaǵyn aýdanynda 1200 úıdiń 300-ge jýyǵy «Qazaqtelekom» AQ ınternetine, sondaı-aq 15-ten astam abonent NLS Kazakhstan jelilerine qosyldy.

B.Aqjarov ákimdiktiń ótken jyly onlaın oqytýǵa kóshýge baılanysty baılanys operatorlarymen birlesip, bazalyq stantsııalardy ornatý boıynsha úlken jumys atqarǵanyn atap ótti. Aýdan boıynsha Qaırat, Nurshashqan, Álmerek shaǵyn aýdandarynda qosymsha alty bazalyq stantsııa ornatyldy.

Avtory: Elaman Turysbekov