Almatynyń mýzeı qyzmetkerleri latyn grafıkasyna kóshýge qoldaý tanytty

ALMATY. QazAqparat - Almatynyń mýzeıler birlestigi qyzmetkerleri qazaq tiliniń latyn grafıkasyna kóshýine baılanysty búgin alqaly jıyn ótkizip, pikirlerin ortaǵa saldy, dep habarlaıdy QazAqparat tilshisi.

Jıyn Almaty qalasy Mádenıet jáne arhıvter basqarmasyna qarasty Almaty qalasy mýzeıler birlestiginiń uıymdastyrýymen Yqylas Dúkenuly atyndaǵy halyq mýzykalyq aspaptary murajaıynda ótti.

Negizgi baıandama jasaǵan A.Baıtursynov atyndaǵy Til bilimi ınstıtýtynyń jetekshi ǵylymı qyzmetkeri, fılologııa ǵylymdarynyń kandıdaty Aısáýle Amanbaeva latyn álipbıiniń mańyzdylyǵyna toqtaldy.

«Qazaq álipbıin latyn grafıkasyna kóshirý eń ózekti máselelerdiń birine aınaldy. Jalpy, latyn álipbıine kóshý álemdik deńgeıde damý úshin qajet. Álem boıynsha elderdiń 70 paıyzdan astamy latyn álipbıin qoldanady. Latyn álipbıine kóshý máselesin 1991 jyly A.Baıtursynov atyndaǵy Til bilimi ınstıtýtynyń sol kezdegi dırektory Ábdiýálı Qaıdar aǵamyz kótergen bolatyn. Osy oıyn jazyp, Elbasyna ashyq hat joldaǵan. Ol kezde latyn álipbıine kóshýge bizdiń áleýmettik te, saıası da jaǵdaıymyz bolmady», - dedi Aısáýle Amanbaeva.

Jıynda QR Prezıdenti N. Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasyndaǵy eń ózekti máselelerdiń biri qazaq tilin birtindep latyn álipbıine kóshirý jumystaryna baılanysty alǵa qoıylǵan mindetter saralandy.

Eske sala keteıik, Elbasy N.Nazarbaev «Bolashaqqa baǵdar: Rýhanı jańǵyrý» atty maqalasynda

«Men 2012 jylǵy jeltoqsan aıynda jarııa etken «Qazaqstan-2050» Strategııasynda «2025 jyl­dan bastap latyn álipbıine kóshýge kirisýimiz kerektigin» málimdedim.

Bul - sol kezden barlyq salalarda biz latyn qar­pine kóshýdi bastaımyz degen sóz.  

ıAǵnı, 2025 jylǵa qaraı is qaǵazdaryn, merzimdi baspasózdi, oqýlyqtardy, bárin de latyn álip­bıimen basyp shyǵara bastaýǵa tıispiz.  

Ol kezeń de taıap qaldy, sondyqtan biz ýaqyt uttyrmaı, bul jumysty osy bastan qolǵa alýymyz kerek. Biz osynaý aýqymdy jumysty bastaýǵa qa­jetti daıyndyq jumystaryna qazirden kiri­semiz. Úkimet qazaq tilin latyn álipbıine kóshi­rý­diń naqty kestesin jasaýy kerek.

Latynshaǵa kóshýdiń tereń logıkasy bar. Bul qazirgi zamanǵy tehnologııalyq orta­nyń, kom­mýnıkatsııanyń, sondaı-aq, HHІ ǵasyr­daǵy ǵyly­mı jáne bilim berý protsesiniń erekshe­lik­terine baılanysty.

Mektep qabyrǵasynda balalarymyz aǵylshyn tilin oqyp, latyn áripterin onsyz da úırenip jatyr. Sondyqtan, jas býyn úshin eshqandaı qıyndyq, kedergiler bolmaq emes.      

2017 jyldyń aıaǵyna deıin ǵalymdardyń kómegimen, barsha qoǵam ókilderimen aqyldasa otyryp, qazaq álipbıiniń jańa grafıkadaǵy biryńǵaı standartty nusqasyn qabyldaý kerek. 2018 jyldan bastap jańa álipbıdi úıretetin mamandardy jáne orta mektepterge arnalǵan oqýlyqtardy daıyndaýǵa kirisýimiz qajet.  

Aldaǵy 2 jylda uıymdastyrý jáne ádistemelik jumystar júrgizilýge tıis.

Árıne, jańa álipbıge beıimdelý kezeńinde bel­gili bir ýaqyt kırıllıtsa alfavıti de qol­danyla turady», - dep jazǵan bolatyn.