Almatynyń Medeý aýdanynda sý áli de keste boıynsha berilip jatyr

ALMATY. QazAqparat - «Almaty Sý» MKK mamandary júrgizgen zerthanalyq taldaýlar táýliktiń túngi jáne tańerteńgi ýaqytynda sýdyń laılaný kórsetkishiniń 16-dan 40 mg/l-ge deıin tómendegenin kórsetti. Bul kórsetkishter, Kishi Almaty ózeninen sýdy osy ýaqyttarda alýǵa jáne tazartýǵa jiberiletin sý kólemin ulǵaıtýǵa múmkindik beredi»,-dep habarlady QazAqpart «Almaty Sý» mekemesine silteme jasap.

Degenmen, Medeý aýdanynyń ońtústik bóligine sýdy keste boıynsha berýge qatysty engizilgen májbúrli sharalar saqtalýda.

Rezervýarlarǵa sý jınaý úshin bıylǵy 27-shildeden 2-shi tamyzǵa deıin sý berý men toqtatýdyń ýaqytsha kestesi ázirlendi.

1 jáne 2 tamyzda sý berý kelesi keste boıynsha júrgiziledi:

– saǵat 7:00-den 13:00-ge deıin – ál-Farabı, Lýganskıı, Chaıkın, Taımanov kósheleriniń kontýryndaǵy kóppáterli turǵyn úıler.

– saǵat 19.00-den 24.00-ge deıin Qurmet kóshesiniń ońtústiginde (joǵaryda) ornalasqan tutynýshylar, onyń ishinde «ıÝbıleınyı» shaǵyn aýdany, Kamenskoe plato, «Evropolıs» TK, «Álem qalashyǵy», «Almaly» TK, Kereı – Jánibek handary kóshesiniń eki jaǵyndaǵy kóppáterli turǵyn úıler.

— saǵat 13.00-den 19.00-ge deıin jáne saǵat 24.00-den 07.00-ge deıin rezervýarlarǵa sý jınaý júrgiziledi.

Buryn habarlanǵandaı, Almaty óńirindegi aptap ystyqtan Kishi Almaty shatqalynda taý basyndaǵy qar jamylǵylarynyń qarqyndy erýi Kishi Almaty ózenindegi sý deńgeıiniń kúrt kóterilýine, jaǵalaýlardyń shaıylýyna jáne jergilikti selderdiń júrýine ákeldi. Ózendegi sýdyń laılanýynyń joǵarylaýy sanıtarlyq normalarǵa sáıkes tazartý júrgizýge múmkindik bermedi.

Medeý aýdanynda sýmen jabdyqtaý shemalaryn qaıta retteý Gornyı gıgant shaǵyn aýdanynda sý berýdi ulǵaıtýǵa jáne Qapparov, Jamaqaev, Ivanılov kóshelerindegi turǵyn alaptaryn tolyq kólemde qamtamasyz etýge múmkindik berdi.