Almatyny kúıik pen tútin ıisi basyp, TJD turǵyndardy betperde kııýge shaqyrdy

ALMATY. QazAqparat- Almatyda tańerteńnen beri aýadan jaǵymsyz ıis sezilip tur, dep habarlaıdy QazAqparat tilshisi.

Almaty qalalyq Tótenshe jaǵdaılar qyzmetkerleri kúıik pen tútin ıisi qaıdan shyqqanyn habarlady.

«Qurmetti qala turǵyndary men qonaqtary. Súıinbaı dańǵyly 50 mekenjaıy boıynsha búgin túnde joıylǵan joǵary janǵysh júktemesi bar qoımadaǵy órttiń saldarynan (aýmaǵy s=295 m2) tútin baıqalady. Órttiń qaldyǵy ómir men densaýlyqqa qaýip tóndirmeıdi»,- dep atap ótti vedomstvodan.

Mamandar órt bolǵan jerge jaqyn turatyn turǵyndarǵa dalaǵa shyqpaýǵa keńes berdi.

«Osyǵan baılanysty sabyrly bolýdy jáne betperde taǵýdy suraımyz. Tynys alý organdary aýrýlary bar adamdarǵa jáne qart adamdarǵa úıden, ásirese órt bolǵan jerge jaqyn turatyn turǵyndarǵa shyqpaýǵa keńes beremiz»,- dep atap ótti departament ókilderi.

Buǵan deıin Almatyda lamınat saqtaıtyn qoımadan órt shyqqany týraly jazǵan bolatynbyz.