Almatylyqtar Denıs Ten jaralanǵan jerge gúlder ákelýde
Qaıǵyly oqıǵaǵa ortaqtastyǵyn bildirip, qoldaryna gúl ustaǵandardyń qarasy artyp keledi. Bul jerde 4-5 saǵat buryn jigittiń «Lexus GX» kóligi turǵan edi. Mashınany polıtsııa qyzmetkerleri zattyq aıǵaq retinde alyp ketti.
«Bul tutas eldiń qazasy! Biz Olımpıada oıyndary kezinde únemi jankúıer bolatynbyz. Kóz jasymdy tyıý múmkin emes. Denıs meniń aǵammen aralasyp turatyn. Ol qazir Shymkentte. Habarlasyp aıtyp edim, birden gúl aparýymdy ótindi», - dedi Nıkıta Zakarın.
«Men ony tanymaıtynmyn. Biraq, bulaı bolǵany óte qorqynyshty. Mundaı sumdyq azamattyq qoǵamda bolmaýy tıis», - dedi qala turǵyny Vladıslav Bragın. 
Qalalyq ІІD baspasóz qyzmetiniń habarlaýynsha, oqıǵa Qurmanǵazy Baıseıitova kósheleriniń qıylysynda búgin túski saǵat 15:00 shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy.
Oqıǵanyń tergelýin QR Іshki ister mınıstri Qalmuhanbet Qasymov ta jeke baqylaýyna alǵan bolatyn.
