Almatylyqtar Beıimbet Maılınniń 125 jyldyǵyna arnalǵan spektakldi tamashalady
Qoıylym Muhtar Áýezov atyndaǵy Qazaq memlekettik akademııalyq drama teatrynyń sahnasynda kórsetildi. Spektakldi tamashalaýǵa ǵalymdar, zııaly qaýym ókilderi, jazýshynyń urpaqtary, ustazdar men jastar keldi.
Іlııas Omarov atyndaǵy Qostanaı oblystyq qazaq drama teatrynyń ártisteri kórermenderge jazýshynyń balalyq shaǵyn, jas kezin jáne ómiriniń sońǵy jyldaryn kórsete aldy. Bas keıipkerdiń rólin Nurlan Baıshın somdady.
«Spektaklde onyń ómirbaıany kóp baıandalady. Ártister jazýshy ómiriniń sońǵy jyldaryn kóremenderge shynaıy kórsetip, sheber jetkize bildi. Ol kezde onyń shyǵarmalaryn Muhtar Áýezov, Іlııas Jansúgirov, Sáken Seıfýllın jáne basqa da kórnekti tulǵalar joǵary baǵalaǵan», - deıdi Qazaqstan Jazýshylar odaǵy tóraǵasynyń orynbasary Baýyrjan Jaqyp.
Pesanyń rejısseri Álııa Baımahan bul qoıylym qazaqtyń kórnekti jazýshysy Beıimbet Maılınniń shyǵarmashylyq murasy ulttyq biregeılikti saqtaýǵa, óskeleń urpaqtyń boıynda rýhanı-aǵartýshylyq qundylyqtardyń damýyna yqpal etetindigin atap ótti.
« Biz kóptegen zertteýler júrgizdik, kitaphanalar men muraǵattardan aqparat izdedik, ártúrli adamdarmen sóılestik. Biz onyń ómirin tek jazýshy retinde ǵana emes, sonymen birge kúıeý, áke retinde de kórsetkimiz keldi. Jastar óz tarıhyn umytpaýy kerek jáne taý tulǵalar týraly bilýi tıis. Bul óte mańyzdy. Jazýshynyń ómiri qıyn jáne túrli oqıǵalarǵa toly boldy, ol kóptegen jaǵdaılardy bastan ótkerdi. Beıimbet Maılın óz halqynyń, óz eliniń naǵyz patrıoty bolǵan dep sanaımyn», - dedi rejısser.
Qoıylym sońynda, Beıimbet Maılınniń nemeresi Dámen Seıtjanova akterler men kórermenderge alǵysyn bildirdi.
Buǵan deıin, spektakl premerasy Qostanaı oblysynda jazýshynyń týǵan jerinde qoıylǵan bolatyn. Aldaǵy ýaqytta elimizdiń basqa aımaqtarynda kórsetiledi.
