Almatylyqtar Ábish Kekilbaıuly mýzeıine erekshe fotoalbomdy syıǵa tartty

ALMATY. QazAqparat - Aqtaýda Qazaqstannyń Eńbek Eri, halyq jazýshysy, kórneki memleket jáne qoǵam qaıratkeri Ábish Kekilbaıulynyń 80 jyldyǵy keń kólemde atalyp ótýde, dep habarlaıdy QazAqparat tilshsi.

Aqtaýda Ábish Kekilbaıulynyń eskertkishi boı kóterdi. Sondaı-aq, Memleket basshysy Qasym-Jomart Toqaevtyń qatysýymen jazýshy qurmetine mýzeı ashyldy. Bul ataýly sharaǵa Almaty ákiminiń orynbasary Erjan Babaqumarov pen QR Jazýshylar odaǵynyń tóraǵasy Ulyqbek Esdáýlet bastaǵan Almaty delegatsııasy da qatysty.

Almatylyqtar mýzeıge jazýshynyń arhıv fotosýretteri bar erekshe albomdy jáne megopolıstiń eń basty mádenı kórneki orny beınelengen kartınany syıǵa tartty. Mýzeıge sondaı-aq, jazýshynyń jeke zattary men kitaptary qoıylǵan.

«Ábish Kekilbaı – óz halqynyń laıyqty uly. Ol urpaqtan urpaqqa beriletin taýsylmaıtyn rýhanı mura qaldyrdy», - dep atap ótti Ulyqbek Esdáýlet.

Keler jyly Aqtaýda zańǵar jazýshy qurmetine teatr men kitaphana salý josparlanǵan.

Aıta keterligi, Almatyda halyq jazýshysynyń esimi ulyqtaldy. Onyń atyna kóshe berilip, qarymdy qalamger turǵan úıge memorıaldy taqtaısha ornatyldy.