Almatylyq jastar qonys toıyn toılady

ALMATY. QazAqparat - Almaty ákimi Baqytjan Saǵyntaev jumys isteıtin jastarǵa páter kiltterin tabystady, dep habarlaıdy QazAqparat tilshisi.

Almaty ákimdiginiń baspasóz qyzmeti habarlaǵandaı, birinshi pýl boıynsha barlyǵy 1244 ótinish kelip tústi. Sonyń ishinde baldyq júıege sáıkes 249 úmitkerdiń tizimi jasaldy. Olardyń ishinde kópbalaly otbasylar, bilim, densaýlyq saqtaý jáne quqyq qorǵaý organdarynyń qyzmetkerleri bar. Almaty ákimdigi ótinishterdi qabyldaıtyn arnaıy www.almaty-jastary.kz saıtyn ázirlegen bolatyn.

30 qazan men 12 qarasha aralyǵynda birinshi pýl boıynsha Alataý aýdanyndaǵy «Kókqaınar» yqshamaýdanynda 249 páterge ótinim qabyldandy. Jyl sońyna deıin taǵy 801 páterge konkýrs jarııalanady. Sóıtip, 1050 jas otbasyny jalǵa beriletin turǵyn úımen qamtamasyz etý josparlanyp otyr.

Aıta keteıik, Elbasy tapsyrmasy boıynsha «Jastar jylyn» ótkizý aıasynda jumys isteıtin jastarǵa jalǵa beriletin turǵyn úıdi satyp alý quqyǵynsyz berý baǵdarlamasy ázirlendi. Bul baǵdarlama 5 jylǵa jeńildetilgen baǵamen jalǵa alýǵa jáne memlekettik baǵdarlamalarǵa qatysý úshin qarajat salýǵa múmkindik beredi. 1 bólmeli páterge aı saıynǵy jaldaý aqysy 4 380 teńgeni bolady. Bul baǵdarlamaǵa:

• 29 jasqa tolmaǵan jastar;

• Almaty qalasyndaǵy tirkeýi - keminde 2 jyl;

• 2 jyldan astam turǵyn úıi joq;

• Aı saıynǵy tabysy keminde 101 000 teńge jáne bankte jınaq shoty (depozıti) bar jastar qatysa alady.

Jyl saıyn osy baǵdarlama boıynsha 1 050 otbasy jaldamaly turǵyn úımen qamtamasyz etiledi. Sonymen qatar, 2020 jyly qosymsha «Almaty jastary 3» qalalyq baǵdarlamasy iske qosylady. Sonyń aıasynda 35 jasqa deıingi 1000 jas otbasyny turǵyn úımen qamtamasyz etý kózdelip otyr. Ótken 2 jylda «Almaty jastary» baǵdarlamasy aıasynda 238 jas otbasy 5 paıyzdyq mólsherlememen páter aldy.