Almatylyq oqýshylar qazaq ánderi men ádebıetin bilýden jarysty
Baıqaýǵa bilim ordasynyń 3,4,5 jáne 6-synyptarynda oqıtyn barlyǵy 600-ge jýyq oqýshy qatysty.
Igi shara Nazarbaev Zııatkerlik mektepteriniń «100 án, 100 kitap» jobasy negizinde qolǵa alynǵan.
«Bul jobany júzege asyrýdaǵy basty maqsat - ulttyq mádenıetimizdiń asyl muralary - án-jyrlar men ádebı shyǵarmalardy qaıta jańǵyrtý jáne balalardyń sol rýhanı qazynalarymyzǵa degen qyzyǵýshylyǵyn oıatý. Ulttyq qundylyqtardy qurmetteı bilýge tárbıeleý. Óıtkeni, búgingi ǵylym men tehnıka damyǵan, jahandaný úderisi júrip jatqan zamanda jasyratyny joq, balalar men jastardyń án jattaýǵa, kitap oqýǵa degen yntasy tómendep barady. Sol úshin óskeleń urpaqty ulttyq ónermen, ulttyq ádebıettiń jaýharlarymen sýsyndata otyryp, Otanǵa adal, ultjandy azamattar etip ósirgimiz keledi. Ulttyq qundylyqtardy qurmetteı bilýge tárbıelegimiz keledi. El birligi - onyń óneri men mádenıtetinde, salt-dástúrinde jatyr. Endeshe mádenıeti, tili myqty eldiń bolashaǵy da baıandy», - dedi osy jobany uıymdastyrýshy, qyryq jyldyq tarıhy bar atalmysh mektep-gımnazııanyń dırektory Qaldyqyz Musaeva.
Baıqaýǵa daıyndyq kezeńi úsh aıdan astam ýaqytqa sozyldy. Osy kezeń ishinde oqýshylar 25 ándi laıyqty deńgeıde jattap alýǵa kúsh salǵan. Joba aıasynda 3,4,5,6-synyptar arasynda «Án salyp, áýen tókken 86» baıqaýy, al 7-men 11-inshi synyptar aralyǵynda «Kitap-sarqylmaıtyn qazyna» baıqaýy boıynsha synǵa tústi. Júrekteri lúpildep, júzderine qýanysh uıalaǵan oqýshylar baryn salyp óner kórsetti. 
«Jarys parallel synyptar arasynda ótti. Ádettegideı emtıhandaǵy sekildi bıletter ázirlendi. Olarǵa bir-bir ánnen jazylyp, jerebe tartyldy. Árbir synyp ándi mýzykanyń súıemeldeýinsiz hormen shyrqady. Bul rette olardyń kıim úlgisine, sahnada óz-ózin ustaýyna, ándi oryndaý sheberligine, ánderdiń shyǵý tarıhyn bilýine basa nazar aýdaryldy. Al kitap baıqaýy boıynsha oqýshylardyń kórkem ádebıetke degen qyzyǵýshylyǵyn anyqtaý úshin «Ádebıet páninen kórkem ádebıetke» atty saýalnama alyndy. Oqýshylardy kitap oqýǵa óz oıyn júıeli baıandaı bilýge daǵdylandyrý maqsatynda poezııalyq keshter men konferentsııalar uıymdastyryldy. Kitaphana qoryn molaıtý maqsatynda «Mektepke kitap syıla» aktsııasy júrgizilip, eń kóp kitap ótkizgen muǵalim men oqýshy maqtaý qaǵazdarymen marapattaldy. Endi aldaǵy jyldary ánder men kitaptardyń sanyn 100-ge jetkizemiz degen oıdamyz» - dedi Q. Musaeva.
Baıqaý qorytyndysy boıynsha jeńimpaz komandalar maqtaý qaǵazdarymen marapattaldy.
Aıta ketý kerek, bul baıqaýdyń alǵashqy kezeńi. Qorytyndy kezeń aldaǵy jyldyń mamyr aıynda ótedi. Oǵan ýaqyt áli bar bolǵanymen, oqýshylar qyzý daıyndyqqa kirisip te ketti.
