Almatylyq medbıke tolǵaǵy qysqan áıeldi úıde bosandyryp aldy

ALMATY. QazAqparat- Ortalyq qalalyq klınıkalyq aýrýhanasynyń medbıkesi Ranaı Álseıitova kórshisiniń qyzyn úıde bosandyryp aldy, dep habarlaıdy QazAqparat tilshisi. Aýrýhananyń baspasóz qyzmeti málim etkendeı, ekinshi balasyna júkti kelinshek ata-anasynyń úıinde qonaqta bolǵan.

«Jas kelinshektiń aıaq asty tolǵaǵy bastalyp ketken. Jedel-járdem qyzmetine habarlasa almaǵan týystary kórshisi, Ortalyq qalalyq klınıkalyq aýrýhanasynyń qyzmetkeri Ranaı Álseıitovaǵa telefon shalyp, kómektesýin ótingen»,- dedi Ortalyq qalalyq klınıkalyq aýrýhanadan.

Túngi ýaqytqa qaramastan kómekke júgirgen Ranaı Álseıitova jas anany úı jaǵdaıynda aman-esen bosandyryp aldy.

«Men kádimgi keńse qaıshysy men jibek jipti qoldandym. Shaqalaqtyń kindigi moınyna eki ret oralyp qalǵan eken. Al, júkti kelinshektiń ózi álsirep ketti, soǵan qaramastan jarty saǵatta bosandyryp aldyq. Ómirge deni saý sábı keldi. Jańa týǵan qyz ben anasyn jedel járdem brıgadasyna tapsyrdyq»,- deıdi ol.