Almatylyq qutqarýshylar taýdaǵy sel jaǵdaıyn baqylaýǵa aldy

ALMATY. QazAqparat - Almaty taýlarynda sel qaýipti kezeń bastalýyna baılanysty 11 shildeden bastap «Qazseldenqorǵaý» Almaty qalalyq tótenshe jaǵdaılar departamentimen birlesip Kishi jáne Úlken Almaty, Qarǵaly jáne Aqsaı ózenderi basseınderindegi asa qaýipti kólderdi sýdan bosatý boıynsha aldyn alý jumysyn qolǵa aldy, dep habarlaıdy QazAqparat tilshisi.

«Almaty qalasy aımaǵynda 51 morenalyq kól bar. Onyń ishinde jarylý qaýpi bar 6-ýynda sýdan bosatýǵa arnalǵan aldyn alý jumysy júrgiziledi. Kólderdi sýdan bosatý, evakýatsııalyq arnalardy tereńdetý, qosymsha sıfondy qubyr ornatý jáne montajdaý boıynsha aldyn alý jumysyn arnaıy tehnıka men Qazseldenqorǵaý mamandary júzege asyryp jatyr. Sıfon qubyrlar men qajetti materıaldardy muzdyq kólderge jetkizý «Qazavıaqutqarý» kómegimen júzege asty», - delinedi qalalyq TJD habarlamasynda.

Morenalyq kólderdiń jaǵdaıyna baqylaý 11 kezeńdi jáne 9 turaqty gıdrobeket arqyly júrgiziledi.

Bul beketter turmysqa qajetti zattarmen, gıdrometeorologııalyq jáne baılanys qurylǵylarymen jabdyqtalǵan modýldi turǵyn úılermen qamtamasyz etilgen.

«Qazirgi tańda morenalyq kólderdiń tolǵany baıqalyp otyr. Biraq ondaǵy sý deńgeıi shektik belgige jetken joq. Sonymen qatar, sel qaýpi monıtorınginiń avtomattandyrylǵan júıesiniń 31 stansasynyń kómegimen morenalyq kólderdiń jaǵdaıyn baǵalaýǵa jáne qazirgi ýaqyt rejıminde gıdrometeorologııalyq jaǵdaıdy qashyqtan baqylaýǵa bolady. Bul júıe sel qaýpi bar kezeńdegi jaǵdaıdy táýlik boıy baqylaýda ustaýǵa múmkindik beredi. Jalpy, maýsym-qyrkúıek aralyǵynda Almaty taýlaryndaǵy sel jaǵdaıy Qazseldenqorǵaý jáne TJD mamandardyń baqylaýynda bolady», - dep habarlady Almaty qalalyq tótenshe jaǵdaılar departamenti.