Almatylyq eki polıtseı áıel erlermen teń dárejede basqarma ǵımaratyn qorǵaǵan
Medeý aýdandyq polıtsııa basqarmasynyń eki ınspektory - Qarlyǵash Kópbaeva men Evgenııa Kalnysheva antyna adal, sertine berik mamandar.
«Áıel qyzmetkerlerdi úılerine qaıtarý usynylǵanda, bizdiń áriptesterimiz Evgenııa Kalnysheva men Qarlyǵash Kópbaeva eki kún boıy erlermen teń dárejede Polıtsııa basqarmasynyń ǵımaratyn qorǵady, qudaı saqtasyn, biraq oqıǵa jaman jaǵynan damyǵan kezde olar bizben birge qarýly qylmyskerlerge qarsy turýǵa daıyn boldy. Bul janqııarlyq is qurmetke laıyq jáne Otanǵa laıyqty qyzmet etýdiń jarqyn úlgisine aınalary sózsiz», – dedi Medeý aýdandyq Polıtsııa basqarmasynyń bastyǵy Dáýren Ótebaev.
Maıor Evgenııa Kalnyshevanyń aıtýynsha, bul kúnderi kezekshi bólimge túsken qońyraý sany úsh esege artqan.
«Qaıǵyly oqıǵa oryn alǵan kúni Polıtsııa basqarmasyna qoǵamdyq tártipti qorǵaýǵa kelý týraly buıryq aldym. 200-den astam qońyraý kelip tústi. Qyzmet óte qıyn boldy. Bul kúni bizdiń kóptegen qyzmetkerler zardap shekti, qaza tapty. Bul jerde, ómirlerin qaterge tikken meniń áriptesterim, dostarym boldy, men olardy tastap kete almadym. Bul meniń mindetim. Eger men osyndaı sátte áriptesterimdi tastap ketsem, týystarym da meni túsinbes edi. Onyń ústine polıtsııa qyzmetkerleriniń kómegine úmit artqandar úshin bul opasyzdyq bolar edi», – dedi Evgenııa Kalnysheva.
Eki polıtseıdi de úıde balalary men týystary kútip otyrdy. Biraq olar azamattardyń qaýipsizdigin jáne Antpen berilgen ózderiniń qyzmettik mindetterin oılady.
«Qazaqstan Respýblıkasynyń kez kelgen patrıoty sııaqty men de qyzmettik boryshymdy adal atqaramyn. Biz bolashaq urpaqqa beıbitshilik pen meıirim, tynyshtyq ornaǵan táýelsiz, gúldengen eldi mura retinde qaldyrýǵa mindettimiz», – dedi Qarlyǵash Kópbaeva.
