Almatylyq bes jas muǵalim Fınlıandııada taǵylymdamadan ótýge joldama alady

ALMATY. QazAqparat - «Almaty ustazy» baıqaýynda jeńiske jetken bes jas pedagog Fınlıandııada taǵylymdamadan ótýge joldama alady. Bul týraly qalalyq bilim basqarmasynyń basshysy Lázzat Jylqybaeva málim etti, dep habarlaıdy QazAqparat tilshisi.

Baıqaýǵa ótinimderdi qabyldaý 1 tamyzda bastalady jáne almatyustazy.kz portaly arqyly júzege asyrylady.

Spıkerdiń aıtýynsha, baıqaýǵa 3 myń muǵalim qatysady dep kútilip otyr.

«Bizdiń maqsatymyz – 36 jasqa deıingi talantty jáne shyǵarmashylyqpen jumys isteıtin jas pedagogtardy tańdaý. Baıqaý qorytyndysy boıynsha 5 jeńimpazǵa Fınlıandııada taǵylymdamadan ótý sertıfıkattary beriledi», - dedi Lázzat Jylqybaeva.

Vedomstvo basshysy almatylyq muǵalimderdi baıqaýǵa qatysýǵa, al oqýshylardy óz tálimgerlerin belsendi qoldaýǵa shaqyrdy.