Almatydan 710 km qashyqtyqta jer silkindi

ASTANA. QazAqparat – QR Tótenshe jaǵdaılar mınıstrligine qarasty «Seısmologııalyq tájirıbe-ádistemelik ekspedıtsııasy» JShS-nyń seısmostantsııalary búgin saǵat 07.53-te jer silkinisin tirkedi, dep habarlaıdy QazAqparat.

Jerasty dúmpýiniń oshaǵy Almaty qalasynan ońtústik-batysqa qaraı 710 km jerde, Tájikstan men Qyrǵyzstan shekarasynda ornalasty.

Energetıkalyq sanaty – 9,8. MPV magnıtýdasy – 4.6. Tereńdigi – 5 km. MSK-64 baǵany boıynsha sezilý týraly aqparat túspegen.

Aıta keteıik, búgin túnde, saǵat 02.07-de Almatydan 740 shaqyrym qashyqtyqta, Tájikstan aýmaǵynda jer silkindi. Terbelis 2-3 ball qýatymen Taraz, Shymkent jáne Túrkistanda sezildi. Sondaı-aq Tájikstandaǵy jer silkinisiniń dúmpýi Ózbekstannyń birneshe qalasyna jetti. Qýaty – 6,5 ball.

Qazaqstannyń 5 óńir turǵyndary jerasty dúmpýin 21 naýryz kúni de sezingen bolatyn. Zilzala oshaǵy Aýǵanstanda ornalasty. Aýǵan elindegi terbelis Pákistanǵa da jetti. Saldarynan kem degende 11 adam qaza bolǵany týraly buǵan deıin jazǵan edik.

22 naýryzda áleýmettik jelide Qazaqstanda jer silkinisi qaıtalanatyndyǵy týraly aqparat tarady. Alaıda, Túrkistan oblysy Tótenshe jaǵdaılar departamenti bul aqparattyń jalǵan ekendigin málimdedi.