Almatydaǵy stýdentterdiń 70%-y – óńirlerden kelip bilim alýshylar

ALMATY. QazAqparat – Ótken jyly Almatyda 255 myńnan astam jas bilim aldy. Bıylǵy oqý jylynda stýdentter sany odan da kóp bolady degen boljam bar, dep habarlaıdy QazAqparat tilshisi.

Almatyda búginde 36 joǵary oqý orny men 94 kolledj bar.

«Ótken jyly 36 JOO-da 182 myń stýdent oqydy, sondaı-aq ótken oqý jylynyń málimeti boıynsha qalada 255 myńnan astam jas bilim alyp shyqqan. Bıylǵy oqý jyly stýdentter sany odan da kóp bolady dep kútip otyrmyz», - dedi qalalyq jastar saıasaty basqarmasynyń basshysy Qaıyrjan Meńdiǵalıev.

Ol sondaı-aq, jyl saıyn Almatyda ornalasqan joǵary oqý oryndarynda bilim alatyn stýdentterdiń shamamen 70%-y óńirlerden keletin stýdentter ekenin jáne 36 JOO-da bir ýaqytta 30 myńnan astam stýdent turatyn 95 jataqhana ornalasqanyn málimdedi.

«Almaty – jastar qalasy. Munda 14 pen 29 jas arasyndaǵy jastardyń sany 440 myńnan asady. Budan bólek, qalamyzda eń kóp joǵary oqý oryndar men kolledjder ornalasqan», - dedi spıker.

Aıta ketsek, Almatyda bıylǵy jyldyń 1 maýsymynan bastap qalalyq jastar saıasaty basqarmasy quryldy. Onyń basty mindeti – qala jastarynyń múddeleri men quqyqtaryn qorǵaý.