Almatydaǵy shuǵyl medıtsınalyq járdem aýrýhanasynyń dárigerleri 2,7 mlrd teńgege kómek kórsetti
«Áleýmettik medıtsınalyq saqtandyrý qory» KEAQ Almaty qalalyq fılıalynyń málimetinshe, 2023 jyldyń 6 aıynda qalalyq shuǵyl medıtsınalyq járdem aýrýhanasy 2,7 mlrd teńgege 20 472 patsıentke kómek kórsetti. Onyń 2,3 mlrd teńgeden astamy MÁMS qarajaty esebinen tólendi.
«Bizdiń aýrýhananyń 20 qurylymdyq bólimshesi bar. Onda 174 dáriger men 344 medbıke eńbek etedi. Naýqastar ádette jedel járdem arqyly jetkiziledi. Ózara baılanystyń arqasynda jedel járdem stantsııasy qyzmetkerleri aýyr jaǵdaıdaǵy patsıent ákele jatsa birden habar beredi. Reanımatologtar pen anestızıologtar brıgadasy ony qabyldaý bóliminen qarsy alyp, ota nemese jansaqtaý bólimshesine jetkizedi», – deıdi aýrýhananyń bas dárigeri Almaz Djývashev.
Aıtýynsha, klınıkaǵa jetkizilgen naýqastar densaýlyq jaǵdaıyna qaraı birden birneshe deńgeıge bólinip, tıisti bólimshelerge jóneltiledi. Qabyldaý bólimi táýligine orta eseppen 240 adam qabyldaıdy.
Syrqaty aýrýhanaǵa jatpaı-aq, emhana deńgeıinde emdelýge keletin patsıentter jasyl aımaqqa túsedi. Olarǵa medıtsınalyq kómek birneshe saǵat ishinde kórsetiledi. Sary aımaqqa – ómirine qaýip tónip turmaǵan, syrqaty ortasha deńgeıdegi naýqastar qabyldanady. Kómek eki saǵat ishinde kórsetiledi. Qyzyl aımaqqa shuǵyl dárigerlik kómekti qajet etetin naýqastar jatqyzylady.
Medıtsınalyq qyzmet patsıentterge kepildendirilgen tegin medıtsınalyq kómek (TMKKK) jáne mindetti áleýmettik medıtsınalyq saqtandyrý (MÁMS) paketteri sheńberinde kórsetiledi.
Dárigerdiń sózinshe, qalalyq shuǵyl medıtsınalyq járdem aýrýhanasy 2 jyldan beri ınsýltti tap basyp tanýǵa múmkindik beretin CEREBRA tehnologııasyn paıdalanyp keledi. Neıroradıologııa salasyndaǵy jasandy ıntellekt ıshemııalyq jáne gemorragııalyq ınsýltti avtomatty túrde anyqtaýǵa, sol arqyly patsıent ómirin saqtap qalýǵa kómektesedi. Oǵan deıin ınsýlt alǵan naýqasqa dıagnoz qoıý úshin MRT apparattary qoldanylatyn. Biraq tomograf túsirgen sýretterden mıdaǵy isik syndy taǵy basqa ózgeristerdi kózben kóre bilý qıyndyq týdyratyn.
«CEREBRA jasandy ıntellekt júıesiniń arqasynda ınsýltti nebári 10 mınýt ishinde anyqtap, dıagnoz qoıýǵa bolady. Nátıjesinde patsıentke birden em-dom taǵaıyndalyp, aǵzanyń mańyzdy fýnktsııalaryn saqtap qalýǵa, nevrologııalyq aýytqýlardyń aldyn alýǵa múmkindik týady. Mysaly, jasandy ıntellektiniń arqasynda dárigerler patsıenttiń basyndaǵy aqaýdy der kezinde anyqtap, ony aman alyp qaldy. Aýrýhananyń angıografııalyq ota zalynda mıdaǵy orta kúretamyrdyń №1 segmentine joǵary tehnologııaly operatsııa jasalyp, uıyǵan qan alyp tastaldy. Jáne bul kez-kelgen klınıkada jasala beretin qatardaǵy operatsııa emes», – deıdi bas dáriger.
Onyń sózinshe, jańa baǵdarlamanyń medıtsına úshin mańyzy zor. Sebebi, ınsýlt Qazaqstandaǵy ólim-jitimniń negizgi sebepteriniń biri. Elimizde bir jylda 40 myńǵa jýyq adamd ınsýlt alsa, onyń jartysy ómirmen qosh aıtysady. Al, patsıentterdiń 80% múgedek bolyp qalady. Sonymen qatar, Qazaqstan ınsýlt meńdep turǵan 30 eldiń qatarynda. Jyl saıyn qalalyq shuǵyl medıtsınalyq járdem aýrýhanasyna ınsýltpen myń patsıent túsedi.
«Elimizde kún saıyn medıtsınalyq saqtandyrý esebinen kardıohırýrgııa, neırohırýrgııa, ýrologııa, travmatologııa, onkologııa, hırýrgııa, t.b. profılder boıynsha júzdegen operatsııa jasalyp jatyr. Osyndaı bir ǵana otanyń quny birneshe mıllıonǵa deıin jetýi múmkin. Mysaly, 2023 jyldyń 6 aıynda aýrýhanada neırohırýrgııa jáne ortopedııa profılderi boıynsha jalpy quny 319,1 mln teńgelik 81 ota jasaldy. Sonyń ishinde 61 operatsııaǵa MÁMS arqyly 226 mln teńge tólendi»,- dedi ol.
Sonymen qatar, Shuǵyl medıtsınalyq járdem aýrýhanasynda sáýleli dıagnostıka salasyndaǵy tuńǵysh ahýaldyq
ortalyq jumys isteıdi. Ortalyq dárigerlerdiń jaǵdaıy aýyr patsıentterge shuǵyl durys dıagnoz qoıyp, shuǵyl kómek kórsetýine múmkindik beredi.
