Almatydaǵy qısaıǵan kópqabatty úı turǵyndarynyń nesıesi qaıta qarala ma

ALMATY. QazAqparat – «Zerdeli» shaǵyn aýdanyndaǵy qısaıǵan úıdiń turǵyndary nesıeni qaıta qaraý týraly ótinishpen «Qazaqstannyń turǵyn úı qurylys jınaq bankine» (TQJB) júgingen joq, dep habarlaıdy QazAqparat tilshisi.

«Bul úıge bizdiń salymshylar qonystandy. Bul «Qoljetimdi baspana» baǵdarlamasy aıasyndaǵy «Jastarǵa arnalǵan baspana» dep atalatyn baǵdarlama bolatyn. Búgingi tańda onda 72 turǵyn bar, onyń 19 turǵyny turǵyn úı nesıesin tóleýge aýysqan. Olardyń satyp alý múmkindigi bar. Qalǵan 47 turǵynnyń bankte esepshottary bar jáne olar qarjy jınaqtaýdy jalǵastyrýda. Búgingi kúni úı turǵyndary ýaqytsha basqa orynǵa qonys aýdardy. Olarǵa jalǵa alǵan páterleriniń aqshasy tólenedi. Ázirge olar bizden qaıta qarastyrýdy suraǵan joq», - dedi «Qazaqstannyń turǵyn úı qurylys jınaq banki» AQ basqarma tóraıymy Lázzat Ibragımova baspasóz máslıhatynda.

Ol bank óziniń klıentterimen kezdesýge jáne qaıta qaraýdyń yqtımal nusqalaryn qarastyrýǵa daıyn ekenin atap ótti.

«Biz 15 qańtarda shyǵatyn saraptama qorytyndysyn kútip otyrmyz. Olar baspana nesıesin keshiktirmeı tólep otyr. Sebebi, olardyń ýaqytsha jaldaǵan páterleriniń aqshasyn qalalyq ákimdik óz moınyna aldy», - dedi Lázzat Ibragımova.

Eske salaıyq, 11 jeltoqsanda Alataý aýdanyndaǵy «Zerdeli» shaǵyn aýdanynyń turǵyndary úıleriniń qısaıǵanyn aıtyp, dabyl qaqqan bolatyn.

Keıin Baqytjan Saǵyntaev qısaıǵan úıdiń turǵyndarymen kezdesip, ákimdik olardy kóshirýge daıyn ekendigin jetkizdi.