Almatydaǵy eski áýejaı ǵımaratyn kóshirý sebebi málim boldy
Almaty halyqaralyq áýejaıynyń baspasóz qyzmetinen habarlaǵandaı, tarıhı ǵımarat 1947 jyly salynǵan jáne ol qalanyń jergilikti mańyzy bar tarıhı-mádenı eskertkishteriniń memlekettik tiziminde tur. QR «Tarıhı-mádenı mura obektilerin qorǵaý jáne paıdalaný týraly» Zańynyń 29-babyna sáıkes, eskertkishtiń ornyn aýystyrý jáne ózgertý onyń saqtalý jaǵdaıyn jaqsartýǵa ákelse, onda kóshirýge ruqsat beriledi. Ol tarıhı-mádenı saraptamanyń qorytyndysy negizinde, ýákiletti organmen kelisim boıynsha oblystardyń, respýblıkalyq mańyzy bar qalalardyń, astananyń jergilikti atqarýshy organdarynyń sheshimimen júzege asyrylady.
Atalǵan eskertkishtiń ornyn aýystyrýǵa kelesi qujattar sebep boldy:
«Áýejaı (halyqaralyq jeliler áýejaıy) «Jergilikti mańyzy bar tarıh jáne mádenıet eskertkishin kóshirý týraly» Almaty qalasy ákimdiginiń 2020 jylǵy 11 qarashadaǵy № 4/492 qaýlysy;
«Qazrestavratsııa» RMK Ǵylymı-zertteý jáne jobalaý fılıalynyń 2022 jylǵy 31 qazandaǵy tarıhı-mádenı saraptamasynyń qorytyndysy;
Qazaqstan Respýblıkasy Mádenıet jáne sport mınıstrliginiń tarıhı-mádenı mura máseleleri jónindegi arnaıy komıssııasynyń 2022 jylǵy 1 qarashadaǵy № 6 hattamasy.
«Sáýlet eskertkishin jyljytý – ony jańa jerde sándik elementtermen qaıta qurý degendi bildiredi. Ǵımarattyń sándik elementteri onyń mádenı jáne tarıhı mańyzdylyǵyn eskertkish retinde aıqyndaıdy. Osyǵan baılanysty ǵımarat qaıta qurylyp, kelesi sándik elementterdiń ózindik kórinisin saqtaıdy: vıtrajdy tereze ornatý, búıir qasbetine sándik relefti-órnekti panelder, perımetri boıynsha relefti-órnekti karnızi bar kóp salaly karnız, peshtak, peshtak pılondarynyń «stalaktıtti» karnızi, pılondardyń buryshtary boıynsha ulttyq orderdiń tórtten úsh oıý-órnekti baǵandary, arka tıpti vıtrajdar, munara (belveder) tóbesi bar, shatyrdyń búkil perımetri boıynsha názik jaqtaý. Mundaı jaǵdaıda jańa halyqaralyq jolaýshylar termınalynyń qurylysyn iske asyrý aıasynda barlyq sándik elementi bar eskertkish Almaty halyqaralyq áýejaıynyń aýmaǵynda 420 metr radıýsta aýystyrylady. Osylaısha, bul ǵımarattyń tarıh jáne mádenıet eskertkishi retindegi saqtalý jaǵdaıyn jaqsartýǵa múmkindik beredi», - dep habarlady áýejaıdyń baspasóz qyzmeti.
Eske salaıyq, Almaty halyqaralyq áýejaıy aýmaǵyndaǵy VIP-termınaly bar eski áýejaıdy súrý jumystary bastalǵanyn habarlaǵan bolatynbyz.
