Almatydaǵy tsement zaýytyn jabý máselesi Joǵarǵy sotta sheshiledi - Erbolat Dosaev

ALMATY. QazAqparat – Almatylyqtar úıleriniń janynda tsement zaýytynyń jumys istegenine narazy. Bul týraly máseleni Almaty ákimi Erbolat Dosaevtyń Jetisý aýdany turǵyndarymen kezdesýinde qala turǵyny kóterdi, dep habarlaıdy QazAqparat tilshisi.

Almatylyqtar 9 jyl boldy úıleriniń janyndaǵy tsement zaýytynyń jabylýyna qol jetkize almaı keledi. Qala turǵynynyń aıtýynsha, sot barlyq ruqsat qujattaryn qaıtaryp alý týraly sheshim shyǵaryp qoıǵan.

«Alaıda zaýyt áli jumys istep tur. Biz alty sotta jeńgen edik. Biraq, qazir bári de oryndaýshynyń sheshimin kútýmen otyr», - deıdi qala turǵyny.

Qala basshysy sottyń sońǵy sheshimi bıyl 1 qyrkúıekte shyǵarylǵanyn, alaıda, kompanııanyń zańgerleri kassatsııalyq shaǵym berip jatqanyn málimdedi.

«Qoldanystaǵy zańnama boıynsha túpkilikti sot sheshimi shyǵarylǵanǵa deıin bizge shara qabyldaýǵa bolmaıdy. Bıznesti qorǵaýdyń búgingi zańdary men erejeleri Almaty ákiminiń ókilettigi shekteýli ekenin kórsetedi. Men zańsyzdyqpen aınalysa almaımyn. Kerisinshe, zań júzinde júrgenimdi kórsetýim kerek. Eger siz zaýyttyń jumysyn toqtatý jolyn bilseńiz, aıtyńyz. Men qazir-aq tapsyrma bereıin. Eger ekologııalyq zańnamada qatań ózgerister bolsa, biz zaýyttyń jumysyn birden toqtata alýshy edik. Biraq, bul máseleni biz sizdermen birge Joǵarǵy sotta sheshetin bolamyz», - dedi Erbolat Dosaev.

Ashyq kózderden alynǵan foto