Almatydaǵy Atletıkalyq aýylda áleýmettik ınfraqurylym men kólik torabyn damytý qarastyrylǵan

ALMATY. QazAqparat- Almatyda 2017 jylǵy qysqy Ýnıversıada oıyndary úshin salynyp jatqan Atletıkalyq aýyl 5 myń sportshyǵa shaqtalǵan. Onda 1 748 páter bar. Búgin baspasóz týry barysynda Ýnıversıada oıyndaryn ótkizý komıtetiniń ókilderi atalmysh nysannyń qurylys jumystarynyń barysy týraly áńgimeledi.

Ýnıversıadaǵa daıyndalý jáne ony ótkizý boıynsha Dırektsııa jetekshisiniń orynbasary Nurgeldi Ábjapparovtyń aıtýynsha,

nysannyń qurylysy grafık boıynsha júrgizilip jatyr.

«Atletıkalyq aýyldaǵy tórt turǵyn úı - 22-shi naýryzǵa qaraı paıdalanýǵa berilse, taǵy tórt turǵyn úı - 9-shy mamyrǵa qaraı beriledi. Al qalǵan eki turǵyn úıdiń qurylysy 6-shy shildege qaraı tolyǵymen aıaqtalady. Abattandyrý jumystaryn tamyz aıynda aıaqtaý kózdelgen», - dedi N. Ábjapparov.

Ol sonymen qatar, qurylysta qazaqstandyq úlestiń 50 paıyzdan asatyndyǵyn jetkizdi.

«Aýyldyń aýmaǵy 21 gektar. Turǵyn úı kesheninen basqa, munda emhana, fıtnes-ortalyq, basseın, saýda úıi, kafe, bank jáne basqa da nysandar ornalastyrylady. Kommertsııalyq aımaqtyń aýmaǵy - 29 myń sharshy metr. Atletıkalyq aýyldaǵy barlyq ǵımarattar halyqaralyq seısmıkalyq standarttarǵa saı keledi», - dedi jobanyń arhıtektory Shuhrat Júsipov.

Sondaı-aq, sáýletshi aýylda áleýmettik ınfraqurylym men kólik toraby damytylatyndyǵyn jetkizdi.

«Keshende 1, 2 jáne 3 bólmelik 1 748 páter bar. Ýnıversıada barysynda aýyl 5 myńdaı sportshyny qabyldaı alady. Al keıin ol tolyqqandy zamanaýı turǵyn úı keshenine aınaldyrylady. Ondaǵy páterler «Qoljetimdi baspana» baǵdarlamasy boıynsha úlestirilýi múmkin», - dedi Sh. Júsipov.

Aıta ketelik, Ýnıversıadanyń barlyq nysandary ústimizdegi jyly 30-shy tamyzǵa qaraı paıdalanýǵa beriledi.