Almatydaǵy aryqtar men nóser kárizderi jańartylmaq

ALMATY. QazAqparat – Almaty kóshelerin jaýyn-shashyn kezinde sý basyp ketetini belgili. Osy máseleni sheshý úshin aryq jelilerin, nóser kárizderin salýǵa jáne jańartýǵa jobalyq-smetalyq qujat ázirlendi, dep habarlaıdy QazAqparat tilshisi.

Qalalyq jasyl ekonomıka basqarmasy basshysynyń mindetin atqarýshy Serik Ádilbaevtyń aıtýynsha, sý sharýashylyǵy júıesine taldaý júrgizildi.

«Jaýyn-shashyn kezinde aǵyndy sýlardyń 90%-y aryq jelileri, joldar arqyly ótip, aryqaraı ózenderge quıady. Tek 10%-y ǵana kollektordyń arnaıy sý burý arnalaryna túsedi. Ókinishke oraı, qazir 16 kollektordyń 4-eýi ǵana jumys istep tur. Sol sebepti, jaýyn-shashyn kezinde Abaı dańǵylynan tómen 56 kósheni sý basady. Ásirese, Raıymbek dańǵylynyń boıyn, Almaty-2 vokzal aýmaǵyn»

, - dedi ol.

Sondaı-aq, qalanyń aryq jelileri men kollektorlary biryńǵaı júıege qosylmaǵan. Al, aryq jelileri men nóser kárizderin jańadan salý jáne jańartý qajet.

«Jobalyq-smetalyq qujat úsh bólikten turady. Birinshi - batys bólikte, ıaǵnı Naýryzbaı, Alataý, Áýezov aýdandarynda jyl basynan beri qurylys-montajdaý jumystary júrip jatyr. Ortalyq bóligi - Bostandyq, Almaly jáne Jetisý aýdandarynda jumysty áli bastaǵan joqpyz. Sebebi, JSQ-ǵa túzetýler engizilýi kerek. Túzetýlerden soń aryqtar kollektorlarmen baılanystyrylady, osylaısha aryq sýlary aryqaraı Esentaı ózenine aǵatyn bolady. Sol arqyly kósheni sý basý máselesi 80%-ǵa sheshiledi degen jospar bar. Al qalǵan 20%-yn sheshý úshin qalanyń tómengi bóligindegi aryqtardy qalpyna keltirip, aǵyn sýlardy qoldanystaǵy kollektorlarǵa jiberemiz. Barlyq aryq júıeleri qoldanystaǵy kollektorlarǵa qosylady. JSQ boıynsha olar qalpyna keltirilip, biryńǵaı operator «Eko Almaty» memlekettik kásipornyna beriledi»

, - dedi Serik Ádilbaev.

Atalyp ótkendeı, JSQ-ǵa qarajat bólingen jaǵdaıda, bul jumystar jyl sońynda bastalyp, kelesi jyly aıaqtalýy tıis.

Buǵan deıin Almatyda sý basýdyń aldyn alý jáne joıý úshin aryq jelileri men ótkelderin tazartý jumystary júrgizilgeni jazylǵan.