Almatyda jyl basynan beri 663 órt shyǵyp, 150 adam qutqaryldy

ALMATY. QazAqparat - Almatyda bıyl bolǵan órt sany ótken jylmen salystyrǵanda azaıǵan. Bul týraly Óńirlik kommýnıkatsııalar qyzmetiniń brıfıngisinde Almaty qalalyq tótenshe jaǵdaılar departamentiniń Memlekettik órt baqylaý basqarmasynyń bastyǵy Erbolat Tórtqaraev aıtty, dep habarlaıdy QazAqparat tilshisi.

Spıkerdiń sózinshe, bıyl shaharda bolǵan órttiń sany ótken jylmen salystyrǵanda 11%-ǵa azaıǵan.

«Bıyl 663 órt oqıǵasy boldy. Onyń ishinde 150 adam qutqaryldy, qaýipti aımaqtan 651 adam evakýatsııalandy, 2 mlrd teńgeden astam somanyń múlki qutqaryldy. Órttiń negizgi kólemi, ıaǵnı, 54%, nemese 342 jaǵdaıy turǵyn úı sektorynda boldy»,- dedi Erbolat Tórtqaraev.

Onyń málimetinshe, órttiń jeke sektorda shyǵýynyń negizgi sebepteri: elektr quraldaryn paıdalaný men montajdaý erejelerin buzý (188 jaǵdaı, nemese 55%), otpen oınaý, otqa baıqaýsyz, abaısyz qaraý (62 jaǵdaı, nemese 18%), peshterdi paıdalaný kezinde órt qaýipsizdigin saqtamaý (38 jaǵdaı, nemese 11%), órt qoıý (20 jaǵdaı), basqa da sebepter (34 jaǵdaı).

«Almatyda órttiń kóp oqıǵasy adamdardyń jylytý aspaptary men gaz quraldaryn nemquraıly paıdalanýynan bolǵan. Almaty qalasy boıynsha qatty otynmen jylytylatyn 2791 úı esepke alyndy. Órt kezinde janǵan azyq-túlikten 4 adam ýlandy», - dedi E.Tórtqaraev.

Onyń aıtýynsha, turǵyndar tútin shyǵatyn murjalardyń bitelip qalý jaǵdaılaryn teksermeıdi. Qaıǵyly jaǵdaılar gaz qurylǵysyn durys qoldanbaý, gazdyń shyǵýynan, rezına shalngysynyń tozýy men gaz ballonyn durys saqtamaýdan bolady.

«Gaz ballondary men gaz qurylǵylaryn sertıfıkattary bar arnaıy uıymdardan ǵana alýǵa shaqyramyz. Avto jáne gaz quıý beketterinde ballonnyń salmaǵy ólshenbeıdi. Gaz qurylǵylaryn, onyń ishinde gaz ballondaryn bógde adamdardan satyp almańyzdar. Gaz qurylǵysyn mamandar qyzmetine júgine otyryp, tekserińizder. Jeldetkish kanaldardyń durystyǵyn baqylańyz. Uıyqtar aldynda úı-jaıdy únemi jeldetip otyryńyzdar», - dep eskertti Erbolat Tórtqaraev.