Almatyda Jomart Ertaevtyń soty bastaldy

ALMATY. QazAqparat – Almatydaǵy qylmystyq ister jónindegi mamandandyrylǵan aýdanaralyq sotta Jomart Ertaevtyń isi qaralyp jatyr, dep habarlaıdy QazAqparat tilshisi.

Sot Roman Selıtskııdiń tóraǵalyǵymen Almaty qalasynyń qylmystyq ister jónindegi mamandandyrylǵan aýdanaralyq sotynyń ǵımaratynda ótip jatyr.

Sot zalynda 37 sottalýshy otyr. Aldyn ala tyńdaýda aıyptalýshylardyń ótinishi qaralady.

Aldyn ala tyńdaýdy taǵaıyndaý týraly sheshimde sot otyrysyna prokýror, qorǵaýshylar, sottalýshylar jáne jábirlenýshiniń ókili shaqyrylýy kerek delingen.

Sottalýshylar B. Ibragım, A.A Sadyqova, N.M Jumabaeva, D, B Edıgeneva, J.J.Ertaev, A.M Igılman, A.B Kusaınova, D.S Týǵanbaı, R.M Batyrbaevany qamaýǵa alý ózgerissiz qaldyrylyp, 2020 jyldyń 28 mamyryna deıin sozylady.

Al, qalǵan sottalýshylarǵa qatysty bultartpaý sharasyn ózgertý máselesi aldyn ala tyńdaý qorytyndysy boıynsha sheshiledi.

Esterińizge sala keteıik, Jomart Ertaev ótken jyldyń mamyrynda Máskeýde QR ІІM Interpoldyń Ulttyq ortalyq bıýrosynyń ótinishi boıynsha ustalǵan bolatyn. QR ІІM málimetinshe, Ertaev asa iri kólemdegi alaıaqtyǵy úshin halyqaralyq izdeýde bolǵan.

Ol «Bank RBK» AQ dırektorlar keńesi tóraǵasynyń keńesshisi bola otyryp, kelisilgen JShS-larǵa 80 mıllıon dollar kóleminde banktik qaryz berýdi lobbılegen, sondaı-aq, alǵan qarajatty aldaǵy ýaqytta qaıtarmaý maqsatynda áreket etken.

Jomart Ertaevpen birge 54 adam kúdikke ilindi, onyń 41-i - banktiń top-menedjerleri jáne qatardaǵy qyzmetkerler.