Almatyda jaýyn kezinde sý jınalyp qalatyn 31 oryn jóndeledi

ALMATY. QazAqparat – Almatyda jaýyn kezinde 102 oryndy únemi sý alyp ketedi. Bul týraly Almaty qalasynyń ekologııa jáne qorshaǵan orta basqarmasy málim etti, dep habarlaıdy QazAqparat tilshisi.

Jaýyn kezinde qalany sý basýdyń negizgi sebepteri – jaýyn-shashyn jelisiniń joqtyǵy, káriz jelisine qosylmaǵan, qoqysqa tolǵan jáne bitelgen aryqtar men kollektorlar, sý aǵyzý qubyrlary dıametriniń sý aǵynynyń kúshine sáıkes kelmeýinen.
«Qazirgi tańda qalada dıametri 500 mm sý aǵyzý qubyrlary paıdalanylady. Olar kelip túsken sý kólemin ıgere almaıdy. Osy máseleni sheshý maqsatynda dıametri 1 metrlik qubyrlar ornatylyp jatyr. Osylaısha, sý aǵyzý qubyrlarynyń ótkizý qabileti eki esege artyp otyr», - dedi Ekologııa jáne qorshaǵan orta basqarmasy basshysynyń m.a. Serik Ádilbaev.
Sondaı-aq basqarma mamandary apattyq qalpyna keltirý jumystary barysynda uzyndyǵy 1,5 myń shaqyrym aryq jelisi boıy 1 464 jerde tuıyqtalǵanyn, 16 kollektordyń 12-si isten shyqqandyǵyn anyqtady.
«Jyl sońyna deıin 31 sý basý ornyn joıyp, 8 kollektor men 3 kanaldy jóndeý josparlanǵan»,- dep habarlady basqarmada.