Almatyda janarmaı qory on kúnge jetedi

ALMATY. QazAqparat - Almaty qalasynyń iri jelilik janarmaı quıý stantsııalary men munaı bazalarynda 11 sáýirdegi jaǵdaı boıynsha shamamen 5,5 myń tonna dızel otyny bar. Aldaǵy úsh kún ishinde oǵan qosymsha taǵy 6,7 myń tonna jetkizilýi tıis.

Bul týraly Almaty qalalyq kásipkerlik jáne ınvestıtsııalar basqarmasynyń baspasóz qyzmeti málim etti, dep habarlaıdy QazAqparat tilshisi.

Vedomstvonyń málimetinshe, qalanyń ortasha táýliktik qajetin eskergende, qolda bar qor 10 kúnge jetedi.

«Sondaı-aq, Shymkent munaı óńdeý zaýytynan Almatydaǵy jelilerge 11,3 myń tonna dızel otyny bólindi. Onyń tólemi jasaldy, endi 5-6 kún ishinde kelýi tıis», - dep habarlaıdy vedomstvonyń baspasóz qyzmeti.

Eske salaıyq, buǵan deıin Almaty ákimdigi avtobýs parkteri men kommýnaldyq qyzmetterdi janarmaımen jetkilikti mólsherde qamtamasyz etý úshin jekelegen janarmaı quıý beketterinen dızel otynyn shyǵarýǵa shekteý qoıǵanyn habarlaǵan bolatyn.