Almatyda jańadan bes mektep salynady

ALMATY. QazAqparat – Almatyda halyq sanynyń ósýi men oqýshy ornynyń tapshylyǵyna baılanysty jańadan 5 mektep salynbaq. Bul týraly Almaty qalasynyń ákimi Erbolat Dosaev máslıhat sessııasynyń otyrysynda aıtty, dep habarlaıdy QazAqparat tilshisi.

«Bilim berý salasyna qosymsha 14,3 mlrd teńge qarastyrylyp otyr. Bul qarajat Naýryzbaı, Túrksib jáne Alataý aýdandarynda 7 500 oryndyq 5 mektep salýǵa, sondaı-aq 19 bilim berý obektisine (15 mektep, 4 balabaqsha) jobalyq-smetalyq qujattamany ázirleýge baǵyttalady», - dedi qala ákimi.

Sondaı-aq, ol muǵalimderge ǵylymı dárejeleri, tálimgerlik pen keshki ýaqytta jáne mektepke deıingi oqytý jumystary úshin qosymsha aqy tólenip, pedagogterge qoldaý kórsetiletinin aıtty. Memlekettik bilim berý uıymdarynyń jylý júıesi boıynsha bereshegin óteý úshin, ıaǵnı kommýnaldyq qyzmettiń aqysyn tóleýge 2 mlrd teńge bólinetinin atap ótti.

Aıta ketsek, Erbolat Dosaev Almatynyń kóshkin júrý qaýpi bar aýmaqtarynda qurylys júrgizýge tyıym salynatynyn málim etken bolatyn.