Almatyda jańa jyldyq keshter ótkizýge ruqsat etildi

ALMATY. QazAqparat – Qazir qoldanystaǵy karantındik talaptarǵa sáıkes Almatyda Ashyq júıesine tirkelgen oryndarda jańa jyldyq keshterdi ótkizýge tyıym salynbaıdy, alaıda shekteýler bar. Bul týraly Almaty qalasy sanıtarlyq-epıdemıologııalyq baqylaý departamenti basshysynyń orynbasary Sádýaqas Baıǵabylov málim etti, dep habarlaıdy QazAqparat tilshisi.

Onyń aıtýynsha, kelýshiler men mekeme qyzmetkerleriniń Ashyq júıesinde «jasyl» statýsy bolýy shart. Sondaı-aq shekteýler Almatynyń jańa jyldyq mereke qarsańynda koronavırýstyń taralýy boıynsha «jasyl», «sary», «qyzyl» aımaqta bolýyna qaraı belgilenedi:

«jasyl» aımaqta - tolymdylyǵy 50%-ke deıin, 100 orynnan kóp emes;

«sary» aımaqta - tolymdylyǵy 50%-ke deıin, 70 orynnan kóp emes;

«qyzyl» aımaqta - tolymdylyǵy 50%-ke deıin, 50 orynnan kóp emes.

«Almaty qalasynyń «jasyl» aımaqta turaqty bolýy eń aldymen megapolıs turǵyndaryna baılanysty – koronavırýsqa qarsy belsendi túrde vaktsına saldyrý, maska taǵý rejımi men araqashyqtyqty saqtaý», - dedi Sádýaqas Baıǵabylov.

Onyń sózinshe, Almatyda koronavırýsqa qatysty jaǵdaı nasharlasa, Ashyq júıesindegi nysandardyń jumys rejımine qatysty karantındik talaptar, sonyń ishinde jańa jyldyq otyrystar men basqa da is-sharalardy ótkizýge qatysty sharalar kúsheıtiledi.

Buǵan deıin qalanyń bas sanıtar dárigeri Jandarbek Bekshın Almaty koronavırýs boıynsha «jasyl» aımaqta tursa da jańa jyl keshteri men otyrystaryn ótkizýge tyıym salǵan bolatyn.

Aıta keteıik, Almatyda 22 qarashadan bastap karantın talaptary jeńildetildi.

Qala 14 qarashada «jasyl» aımaqqa ótti.