Almatyda zardap shekken ǵımarattardy jóndeý jáne qalpyna keltirý jumystary júrip jatyr

ALMATY. QazAqparat - Almatyda jappaı tártipsizdik kezinde 291 ǵımarat, onyń ishinde 62 ákimshilik ǵımarat zardap shekti. Bul týraly brıfıng barysynda qala ákiminiń orynbasary Muhıt Ázirbaev aıtty, dep habarlaıdy QazAqparat tilshisi.

«12-16 qańtar aralyǵynda órtten zardap shekken úı-jaılardy tazartý júrgizildi. QazQSǴZI «Qazaqstan» telearnasynyń, Bas prokýratýranyń ókildiginiń, Almaty polıtsııa departamentiniń jáne aýdandyq polıtsııa basqarmalarynyń ǵımarattaryndaǵy tehnıkalyq tekserýdi aıaqtady. Qalalyq ákimdik ǵımaraty boıynsha zertteý nátıjeleri 2022 jyldyń 28 qańtaryna kútilýde», - dedi ákim orynbasary.

Onyń aıtýynsha, smetalyq norma boıynsha jalpy somasy 28,6 mlrd teńgege 10 nysandy qalpyna keltirý jumystarynyń aldyn ala quny eseptelgen.

««Qazaqstan» telearnasy 1 tamyzǵa deıin, al qalalyq ákimdik ǵımaratyna 5 aıda kúrdeli jóndeý men qaıta jańartý jumystary jasalady dep kútilýde. Sondaı-aq, jeti nysanda, onyń ishinde Bas prokýratýra ǵımaratynda, polıtsııa departamentiniń toǵyz ǵımaratynda aǵymdaǵy jóndeý jumystary bastaldy. Aǵymdaǵy jóndeýdiń barlyq nysandary boıynsha josparly aıaqtaý merzimi – 1 mamyrǵa deıin», - dep naqtylady Muhıt Ázirbaev.

Spıkkerdiń sózinshe, bıznestiń áleýmettik jaýapkershiligi esebinen memlekettik organdardyń 28 nysanynda jóndeý jumystary júrgizilýde.

Atap aıtar bolsaq, bes densaýlyq saqtaý nysanynyń úsheýinde jumystar aıaqtaldy, úsh aýdandyq polıtsııa basqarmasynda olardy 28 qańtarǵa deıin aıaqtaý kózdelgen.

Zardap shekken 20 modýldik polıtsııa beketteriniń beseýi janyp ketken – olardyń ornyna jańalary ornatylady, taǵy 15-i qalpyna keltiriledi, olardyń 9-da jumystar aıaqtalý satysynda.

«Búginde jumys komıssııasy Almatyda 281 ShOB nysanyn anyqtady, onda jóndeý qajet, olardyń segizine kúrdeli. Zardap shekken nysandardyń jalpy sanynan 184-i boıynsha tehnıkalyq tekserý bastaldy, 87-i memlekettik saraptamaǵa joldandy, 24-i rastaldy. Qalǵan 97shaǵyn jáne orta bıznes sýbektisi óz qarajaty esebinen qalpyna keltirilip, 13 nysanda jóndeý-qalpyna keltirý jumystary aıaqtaldy», - dedi qala ákiminiń orynbasary.

Sonymen qatar, ol tártipsizdik kezinde 11 turǵyn úı zardap shekkenin jetkizdi. Olardy qalpyna keltirý jumystar osy aptada bastalady. Búgingi kúni terezesi synǵan 51 páterdiń áınegi salyndy.