Almatyda zańsyz salynǵan garajdar súriledi

ALMATY. QazAqparat - Almatynyń Bostandyq aýdanynda zańsyz salynǵan 250-ge jýyq garajdy buzý josparlanǵan. Bul týraly aýdan ákimi Altaı Rahymbetov málim etti, dep habarlaıdy QazAqparat tilshisi.

Óńirlik kommýnıkatsııalar qyzmetiniń brıfınginde aýdan ákimi Altaı Rahymbetovtan jýrnalıster aýdan aýlalaryndaǵy zańsyz salynǵan garajdar men qosalqy qurylystar máselesi qashan sheshiletinin surady.

«Biz bul jumystardy qolǵa aldyq. Ókinishke oraı, búgingi kúni bizde aýla aýmaqtarynda, kóshelerde ornalasqan osyndaı 500-ge jýyq nysan bar. Basym bóliginiń tıisti qujaty joq, biraq ıeleri olardy barlyq jolmen qaldyrýǵa tyrysady. Mundaı jaǵdaılarda sotqa júginýimizge týra keledi, bul biraz ýaqytty alady. Biz bul jumysty jalǵastyramyz, kelesi jyly zańsyz turǵan 250-ge jýyq garajdy buzýdy josparlap otyrmyz», - dedi aýdan ákimi.