Almatyda volonter jyly qorytyndylandy

ALMATY. QazAqparat – Almatynyń volonter uıymdary jyl basynan beri 26 myńnan astam qala turǵynyna kómek kórsetti. Bul týraly Óńirlik kommýnıkatsııalar qyzmetinde ótken onlaın brıfıng barysynda «Qazaqstan eriktileri lıgasy» QQ Almaty fılıalynyń jetekshisi Baǵdat Anarbaeva aıtty, dep habarlaıdy QazAqparat tilshisi.

Onyń aıtýynsha, Almatyda eriktiler jylyn ótkizý aıasynda 78 is-shara jospary bekitildi. Barlyq jobalar men is - sharalar Memleket basshysy belgilegen mindetterge sáıkes ázirlendi jáne úılestirildi. «Sabaqtastyq», «Saýlyq», «Taza álem», «Asyl mura», «Qamqor», «Bilim», «Úmit» baǵyttary boıynsha júzege asyryldy.

Karantınniń birinshi kúninen bastap Almaty qalasynyń ákimdigi Jastar loft-ortalyǵynyń negizinde jedel volonterlik shtab qurylyp, onyń quramyna qalalyq volonterlik, medıtsınalyq jáne qoǵamdyq uıymdar endi.

Jalpy qala boıynsha 1000-ǵa jýyq volonter jumys istedi, onyń ishinde shtabqa 100-ge jýyq turaqty volonter tartyldy. Eriktilerge koronavırýstyń taralýy jaǵdaıynda qaýipsizdik tehnıkasy men gıgıena erejeleri úıretildi. Sonymen qatar, eriktilerge tótenshe jaǵdaı kezindegi saqtyq sharalary týraly qajetti nusqaýlar berildi. Qaýipsizdik tehnıkasyn saqtaý maqsatynda volonterler úshin jeke qorǵanys jaǵdaıy jasaldy. Bul - arnaıy kıim, maska, sterıldi qolǵap, bahıla, antıseptık, sondaı-aq arnaıy kólik jáne ystyq tamaq.

Shtabtyń negizgi qyzmeti halyqtyń muqtaj sanattaryna kómek kórsetýge baǵyttaldy.

«Pandemııa kezinde muqtaj 26 myńnan astam azamatqa azyq-túlik paketteri, medıtsınalyq betperdeler taratý, dári-dármek jetkizý túrinde kómek kórsetildi. Shtab turaqty negizde qoǵamdyq oryndarǵa monıtorıng júrgizdi. Buzýshylyqtar anyqtalǵan kezde ýákiletti organdar kásiporyndardyń jumysyn shekteıtin sharalar qabyldady. Sondaı-aq, eriktiler qalalyq medıtsına qyzmetkerlerine basqa elderden kelgen azamattardy aýrýhanalarǵa ornalastyrýǵa kómektesti», - dedi Baǵdat Anarbaeva.

Jedel eriktiler shtabynyń volonterleri myna baǵyttar boıynsha kómek kórsetti:

- 4115 muqtaj jáne áleýmettik osal azamattarǵa kómek kórsetildi, 193 otbasyna medıtsınalyq betperdeler taratyldy, iri sýpermarketterde 9972 azyq-túlik paketteri ólshenip, oralyp (áleýmettik ál-aýqat basqarmasynyń usynylǵan tizimine sáıkes múgedektigi bar turǵyndarǵa, qart adamdarǵa-tamaq ónimderin, dári-dármekterdi jáne t. b. tasymaldaýǵa kómek kórsetildi);

- 166 nysanda qoǵamdyq monıtorıng júrgizildi, onyń ishinde 80 nysanda buzýshylyqtar anyqtaldy, onyń qorytyndysy boıynsha ýákiletti organdar tıisti sharalar qabyldady (qyzmetti júzege asyrýda shektelgen saýda jáne qyzmet kórsetý obektileri jumys istedi);

- qalanyń 100 dárihanasynda qajetti dári-dármekterdiń baǵasyn negizsiz kóterý faktilerin anyqtaýǵa qoǵamdyq monıtorıng júrgizildi, onyń qorytyndysy boıynsha ýákiletti organdar tıisti sharalar qabyldady;

- sımptomsyz koronavırýstyq ınfektsııamen aýyratyn 80-nen astam turǵynǵa dári-dármekterdi tasymaldaýǵa kómek kórsetildi;

- 5000 gýmanıtarlyq kómek qorapshasyn túsirý;

-6250 turǵynǵa jedel jeli telefony arqyly adamdarmen baılanyssyz aqparattyq-túsindirý jumystary kórsetildi (kún saıyn call-ortalyqqa 100-den astam qońyraý túsedi).

Esterińizge sala keteıik, buǵan deıin volonter jylynyń resmı jabylýy aıasynda Almaty ákimi Baqytjan Saǵyntaev QR Tuńǵysh Prezıdenti – Elbasy jáne Memleket basshysynyń atynan volonterler men jastar uıymdarynyń ókilderine marapat pen alǵys hat tabys etken bolatyn.