Almatyda ujymdyq ımmýnıtet qalyptasa bastady – Baqytjan Saǵyntaev

ALMATY. QazAqparat – Halyqty jappaı vaktsınatsııalaý ujymdyq ımmýnıtettiń qalyptasýyna yqpal etýde. Bul týraly «Almaty» telearnasyndaǵy tikeleı efır barysynda Baqytjan Saǵyntaev málim etti, dep habarlaıdy QazAqparat tilshisi.

Onyń aıtýynsha, Almaty qalasynda koronavırýs boıynsha epıdemıologııalyq ahýal 20 qazannan bastap turaqtana bastady. Optımıstik boljamǵa sáıkes, táýligine 300-ge deıin jaǵdaı tirkelip otyr.

«Pandemııa bastalǵannan beri Almatyda KVI-diń 177,2 myń jaǵdaıy tirkeldi, bıylǵy jyldyń basynan beri – 158,7 myń adam vırýs juqtyrdy. derttiń aptalyq kórsetkishi 100 myń turǵynǵa shaqqanda bir apta burynǵy 113,9-dan 89,5-ke deıin jáne táýliktik ósim 0,14-ke deıin tómendedi. Onyń ústine, ınfektsııanyń berilý ındeksi 0,98-den 0,88-ge deıin azaıdy»,- deıdi Baqytjan Saǵyntaev.

Sonymen qatar, ol aldyn ala júrgizilgen profılaktıkalyq sharalar koronavırýstyń tómendeýine yqpal etkenin tilge tıek etti. Eń basty tıimdi shara – jappaı vaktsınalaný, sonyń arqasynda ujymdyq ımmýnıtettiń artýy baıqalady. «Búgingi kúni resmı tirkelgen halyq sanynyń 54,4%-yn quraıdy. Halyqtyń resmı sanynyń 46,5%-y eki komponentpen vaktsınalandy, al jyl basynan beri aýyryp jazylǵan adamdardyń 7,9%-y ekpe saldyrdy»,-dedi ol. Sońǵy táýlikte qalada koronavırýs ınfektsııasy 230 adamnan anyqtaldy.

Onyń 222-i sımptomdy. Búgingi kúni ınfektsııalyq statsıonarlarda 1056 eresek adam jáne 28 bala em qabyldap jatyr.