Almatyda úı karantıni talabyn buzǵan 124 turǵyn «qyzyl» mártebeli bolyp shyqty

ALMATY. QazAqparat - Almatyda bıylǵy jyldyń 20 qańtary men 3 aqpany aralyǵynda 124 turǵynnan «qyzyl mártebe» anyqtaldy. Olarǵa úı karantınin buzǵany úshin 30 aılyq eseptik kórsetkish kóleminde aıyppul salyndy, dep habarlaıdy QazAqparat tilshisi.

Almaty qalasynyń sanıtarııalyq-epıdemıologııalyq baqylaý departamentinen habarlaǵandaı, COVID-19 úshin PTR testi oń nátıje bergen almatylyqtar qoǵamdyq oryndarǵa baryp, «Ashyq» boıynsha jumys isteıtin nysandardyń (HQKO, saýda oıyn-saýyq ortalyǵy, medıtsına uıymdary, bazarlar, tamaqtaný nysandary, fıtnes-ortalyqtar, bankter, áýejaı, kompıýterlik klýbtar jáne t.b.) qyzmetterin paıdalanýǵa tyrysty. «Qyzyl mártebesi» anyqtalǵan atalǵan turǵyndar «Ashyq» boıynsha jumys isteıtin nysandarǵa jiberilgen joq.

Osyǵan oraı, qalalyq SEBD ambýlatorııalyq deńgeıde emdelip jatqan qala turǵyndaryn ózin-ózi oqshaýlaý rejımin buzbaýǵa, qoǵam aldynda azamattyq jaýapkershilik tanytýǵa shaqyrdy.

«Vırýs juqtyrǵan adamdarmen baılanysta bolǵan tulǵalar ózin-ózi oqshaýlaý rejımin saqtaýy jáne basqa adamdarǵa juqtyrmas úshin adamdar kóp jınalatyn oryndarǵa barmaýy tıis. Sonymen qatar, «Ashyq» jobasynyń qatysýshylaryna Almaty qalasynda koronavırýs ınfektsııanyń taralýyna jol bermeý maqsatynda barlyq kelýshilerdi skanerleý qajettiligin eske salamyz», - delingen habarlamada.

Al Almatyda «qyzyl mártebesi» bar, úı karantıni talabyn buzyp, 30 AEK mólsherinde aıyppul salynǵan turǵyndardyń tizimin myna jerden kórýge bolady.