Almatyda úsh ózenniń arnasy qaıta qalpyna keltirilip jatyr
Mınıstr keltirgen málimetke sáıkes, Almaty taý bókterinde barlyǵy 50-den astam muzdyq kól bar. Qala halqyn selden qorǵaý úshin Aqsaı jáne Aıýsaı shatqaldarynda seldi toqtatatyn bógetter salynyp jatyr.
Onyń aıtýynsha, byltyr Úlken jáne Kishi Almaty, Qarǵaly jáne Aqsaı ózenderiniń basseınderinde 31 sel qaýpin avtomattandyrylǵan monıtorıngileý stantsııasy ornatyldy, bul qaýipti ýchaskelerdi naqty ýaqyt rejıminde qashyqtan baqylaýǵa múmkindik beredi.
«Sý tasqynyna qarsy is-sharalardyń Jol kartasyn iske asyrý sheńberinde 2023 jylǵa deıin Kishi Almaty, Tiksaı, Esentaı ózenderiniń arnasyn qaıta qalpyna keltirý jumystary aıaqtalady, Jarbulaq ózeni boıynsha jumystar jalǵasýda. Ákimdik qalanyń ár jerindegi aryq jelisin rekonstrýktsııalaý jumystaryn júrgizýde. Bul turǵyn úılerdi sý basý qaýpin azaıtýǵa múmkindik beredi», - dep atap ótti ıÝrıı Ilın Almaty halqymen kezdesý barysynda.
Sonymen qatar, ol sel jáne syrǵyma jaǵdaıyn baǵalaý úshin Qazselqorǵaý bólimsheleri aldyn alý is-sharalaryn júrgizetinin tilge tıek etti.
«Atap aıtqanda, jyl boıy baqylaý júrgiziledi, maýsymdyq beketter qoıylady, jerústi jáne aerovızýaldy tekserýler, sondaı-aq kóshkin ýchaskelerin nyǵaıtý jáne serpindi qaýipti kólderdi bosatý boıynsha jumystar júrgiziledi. Qabyldanyp jatqan sharalar kóshkin qaýpi bar ýchaskelerdiń sanyn 80-nen 68-ge deıin azaıtýǵa múmkindik berdi, olardyń 7-eýi Іle-Alataý parkiniń aýmaǵynda ornalasqan», - dedi ol.
