Almatyda uly tulǵalar saıabaǵy ashylady
Jıynǵa kásibı tarıhshylar, kórnekti qoǵam qaıratkerleri, memlekettik organdar ókilderi, ǴZI ókilderi, doktoranttar jáne jas ǵalymdar qatysty. Belgili ǵalym, shyǵystanýshy Ábsattar Derbisáli óz baıandamasynda esimderi el esinen tys qalǵan tulǵalar týraly tilge tıek etti.
«Biz oqyǵan jyldary oqýlyqtarda shyǵys oıshyldarynan ál-Farabı, Balasaǵunı, Qashǵarıdan basqa eshkim bolmaıtyn. Shyn máninde solaı ma? Olaı emes. Biz bir ǵana ál-Farabıdi bildik, 1968 jyldary Fılosofııa ınstıtýty janynan ál-Farabı murasyn zertteıtin ortalyq ashyldy. Shyn máninde, ál-Farabı jalǵyz emes edi. Meniń zertteýimde 30 ál-Farabı boldy, bir ǵana Taraz qalasynyń ózinen 7-8 ǵalym shyqqan, ál-Merkıı, ál-Balasaǵunılar kóp bolǵan. Sondyqtan, qazaq mádenıetiniń qalyptasýyna úles qosqan ǵalymdardyń bárin bilý - óte mańyzdy. Bul jobalar tarıhshylar men etnologtarǵa keń dańǵyl jol ashyp otyr», - dedi Ábsattar Derbisáli.
Sh.Ýálıhanov atyndaǵy tarıh jáne etnologııa ınstıtýty dırektorynyń ǵylymı jumystar boıynsha orynbasary Saıyn Borbasov «Uly dalanyń uly esimderi» oqý-aǵartý saıabaǵynyń tujyrymdamasy týraly aıtyp ótti.
«Prezıdent maqalasynda aıtylǵan mindetterdiń birin oryndaý maqsatynda Uly Dalanyń uly tulǵalarynyń esimder galereıasy ashylady. Bizdiń mindet - soǵan kiretin tulǵalardy irikteý. Bizde mektep pen JOO baǵdarlamasynda tek 7-8 adam ǵana aıtylady. Bul ádiletti emes. Shyn máninde, bizdiń elge, qazaq eliniń rýhanı damýyna eńbek sińirgen tulǵalar kóp bolǵan. Rýhanı murasy umyt bolǵan, bizge jetpegen kóptegen ǵulamalar bar. Tek Tarazdan shyqqan 51 ǵulama bar. Merkeden shyqqan 7-8 adam bar. Osy tulǵalarymyzdyń eńbekterin tereń zerttep, rýhanı aınalysqa, mádenı keńistikke engizý kerek», - dedi saıasattaný ǵylymdarynyń doktory, tarıhshy, professor, Tarıh ınstıtýty dırektorynyń orynbasary Saıyn Borbasov.
Sonymen qatar, Uly dalanyń uly esimderi jobasy men tujyrymdamasynda mýltımedıalyq karta jasaý josparlanǵan.
«Uly dalanyń uly esimderi» tujyrymdamasyn jasaǵan kezde arnaıy ınteraktıvti karta týraly bólimdi kirgizdik. Tizimnen qalyp qoıǵan, qosylýy tıis degen tulǵalardy engizý úshin portal jasamaqpyz. Portal arqyly jas ǵalymdar pikir almasyp turady, mýltımedıalyq faıldar ornatylady. Qazir tizimge 80-nen astam adam ilindi», - dedi Sh.Ýálıhanov atyndaǵy tarıh jáne etnologııa ınstıtýty dırektorynyń qoǵammen baılanys jónindegi orynbasary Áýezhan Shashaev.
