Almatyda «Uly dala órnekteri» kórmesi ashyldy

ALMATY. QazAqparat - Almatyda Á.Qasteev atyndaǵy QR Memlekettik óner mýzeıinde «Uly dala órnekteri» kórmesi ashyldy, dep habarlaıdy QazAqparat tilshisi.

«Uly dala órnekteri» kórmesi kórermenderdiń nazaryna qazaq halqynyń keste buıymdary men dástúrli áshekeıli beldikterdiń úzdik úlgilerin usyndy. Kórme zalyna qoıylǵan dúnıelerdiń árqaısysy biregeı. Túskıizderdiń oıý-órnekti saryndary men polıhromdy gammasynda Uly dala rýhy seziledi.

Munda kestelengen buıymdardyń alýan túri bar. Qolóner sheberleri órnekterge erekshe mán bergen. Túskıiz ben kilemderde beınelengen ár sýrettiń ózindik mán-maǵynasy bar.

Qazaq halqy kesteli ónerinde, ósimdik elementterin kóp paıdalanǵan. Mysaly, ırek butaqtar, jemister, gúlder men tiri tabıǵat beınesin jıi qoldanǵan.

Bilikti sheberler áshekeıli beldikterdi bylǵarydan nemese taza barqyt matasynan jasaǵan. Sondaı-aq, beldikti kúmis jáne asyl tastarmen bezendirgen. Bul belbeýler zergerlik buıymdardyń shynaıy týyndysyna jatady.

Ortalyq Azııa kóshpendileriniń dońǵalaqty, aǵash, temir ustalyǵy men kıiz úıdi oılap tabýy adamzat qyzmetiniń kóptegen salalaryn damytýǵa yqpal etti. Mysaly, mashına jasaý, jeńil ónerkásip, sáýlet jáne t.b salalardyń órkendeýine túrtki boldy.

Kóshpendiler órkenıeti «Saq - ań stıli», geometrııalyq, polıhromdy pishindi qalyptastyrǵan. Kóshpendiler mádenıeti qazaq oıý-órneginde jáne ózindik halyq qoldanbaly ónerinde saqtalǵan.