Almatyda úkimettik emes uıymdardyń VІ forýmy ótip jatyr
dep habarlaıdy QazAqparat.
Forýmda úkimettik emes uıymdar men memlekettik organdardyń ózara árekettesýi, azamattyq qoǵam bastamalary men múddelerin, áleýmettik mańyzdy jobalardy júzege asyrý, ÚEU-dy aqparattyq turǵydan qamtamasyz etýdi kúsheıtý, memlekettik organdarmen ózara áriptestik qarym-qatynas mehanızmin jetildirý máseleri talqylanýda. Bul taqyryptardy talqylaý 5 pikirtalas alańy boıynsha ótkizilýde. Sondaı-aq forým aıasynda ÚEU júzege asyrǵan áleýmettik mańyzdy jobalar kórmesi uıymdastyrylǵan.
Sharaǵa qala ákiminiń orynbasary Serik Seıdýmanov, «Jastar stýdenttik qurylys jasaqtary» qoǵamdyq birlestiginiń tóraǵasy Almasbek Nuǵmanov, QR Tuńǵysh Prezıdenti qory janyndaǵy Álemdik ekonomıka jáne saıasat ınstıtýty, Halyqaralyq zertteýler ortalyǵynyń basshysy Ýalıhan Tóleshov, sondaı-aq memlekettik organdardyń, saıası partııalar men úkimettik emes uıymdardyń basshylary, jastar uıymdarynyń, buqaralyq aqparat quraldarynyń ókilderi qatysýda.
Qala ákiminiń orynbasary Serik Seıdýmanovtyń aıtýynsha, qazirgi kezde elimizde 25 myń kommertsııalyq emes uıymdar bolsa, onyń 11 myńy Almatyda tirkelgen. Sondaı-aq ÚEU-dyń basym bóligi Almatyda ornalasqan. «Bul qalanyń belsendi túrde damýyna yqpal etýde. Qala ákimshiligi de óz tarapynan ÚEU-darmen tyǵyz qarym-qatynasta jumys isteıdi. Bıylǵy jyly qala qazynasynan olardy qoldaýǵa 80 mıllıon teńge bólindi. Biz bul somanyń 100 mıllıonǵa deıin jetýine yqpal jasaımyz», dedi qala ákiminiń orynbasary. Ol sondaı-aq ÚEU-dyń birqatar ózekti máseleri barlyǵyn da atap ótti. Máselen, Demokratııa úıinde memlekettik organdardyń ornalasýyna baılanysty ÚEU-ǵa keńse bólmeleri jetispeıdi. Serik Seıdýmanov jańa ǵımarattar salynsa, ÚEU-ǵa arnaıy keńseler beriletinin jetkizdi. Ol sondaı-aq qoǵamdyq sala menedjerlerin daıyndaý úshin arnaıy kýrstar ashý qajet dep esepteıtindigin atap ótti.
