Almatyda UBT tapsyrý pýnktterinde qaýipsizdik sharalary kúsheıtiledi

ALMATY. QazAqparat – Almatyda UBT tapsyrý barysynda epıdemıologııalyq jaǵdaı qatań saqtalady. Bul týraly onlaın brıfıng barysnda qalalyq sanıtarııalyq-epıdemıologııalyq baqylaý departamenti bilim jáne tárbıe obektilerin baqylaý jáne qadaǵalaý bóliminiń basshysy Dına Sýhanberlıeva aıtty, dep habarlaıdy QazAqparat tilshisi.

Basty maqsat – epıdemıologııalyq jaǵdaı boıynsha Almatynyń «qyzyl» aımaqta bolýy aıasynda koronavırýstyq ınfektsııanyń taralýyna jol bermeı, UBT ótkizý qaýipsizdigin qamtamasyz etý.

Dına Sýhanberlıevanyń aıtýynsha, sanıtarlyq-epıdemıologııalyq baqylaý departamenti test ótkiziletin ǵımarattarda zerthanalyq-aspaptyq zertteýdi aıaqtady.

«UBT ótkizý pýnktinde daıyndyq jumystary júrgizildi: irgeles aýmaqty, ǵımarattyń ishki jaǵyna tazalyq jumystary júrgizilip, jaryqtandyrý aspaptary, jeldetý júıesi tekserildi, medıtsınalyq pýnkt daıyndaldy. Oqýshylar men qyzmetkerlerdiń jeke gıgıenasyn saqtaý úshin jaǵdaılar jasalǵan. Aýyz sý rejımi uıymdastyrylǵan, oqýshylar kólemi 0,5 l bótelkedegi sýmen qamtamasyz etiledi, sonymen qatar qosymsha sý dıspenserleri ornatylady»,-dedi ol.

Sonymen qatar, ol oqýshylarǵa alǵashqy medıtsınalyq kómek kórsetý úshin qajetti jaraqtarmen jáne dári-dármektermen jabdyqtalǵan medıtsınalyq pýnkt jumys isteıtinin atap ótti. Sondaı-aq jedel medıtsınalyq kómek brıgadasynyń kezekshisin, aımaqtyq emhanalardyń dárigerlerin tartý kózdelgen.

«Sanıtaızer, teplovızor, dezınfektsııalyq eritindilermen jáne aıaq kıimge arnalǵan kilemsheler, bakterıtsıdti shamdar, aýa retsırkýlıatorlary, paıdalanylǵan maskalarǵa arnalǵan ýrnalar, áleýmettik qashyqtyqty saqtaý úshin kireberistiń aldynda jáne ǵımarat ishinde belgileý bári qamtylǵan. Aýdıtorııalarda kondıtsıoner, qabyrǵa saǵattary, beınebaqylaý kameralary jáne beınetirkegishter qoıyldy», - deıdi Dına Sýhanberlıeva.