Almatyda ýaǵyz-nasıhat jumystary onlaın ótedi

ALMATY. QazAqparat - Ramazan aıynda aıtylatyn ýaǵyz-nasıhat, suraq-jaýap jumystary onlaın rejımde ótedi. Bul týraly Almaty qalasynyń óńirlik kommýnıkatsııalar qyzmetiniń alańynda ótken brıfıngide qalanyń bas ımamy Erkinbek Shoqaı aıtty, dep habarlaıdy QazAqparat tilshisi.

«Qalamyzdaǵy tanymal qarılar onlaın Quran hatym oqıdy. Áleýmettik jelidegi Azan.kz paraqshasy arqyly kúndelikti saǵat 14.00-de onlaın qatysýǵa bolady. Ramazan aıynda 8 [phone], 8 700 719 7622 baılanys telefondary arqyly Almaty Ortalyq meshitiniń Pátýa Call-ortalyǵy turǵyndardyń suraqtaryna jaýap berip otyrady», - dedi ımam.

Sonymen birge, Erkinbek Shoqaı qasıetti aıda qaıyrymdylyq jasap, saýap alýdy nıet etken jandar «Berekeli Ramazan tosynsyıy», «Aýyz ashar qorjyny» atty aktsııa aıasynda aýyzashar qoraptaryn eriktiler nemese meshit qyzmetkerleri arqyly kómekke muqtaj azamattardyń úılerine jetkiziletinin aıtty.

Sonymen birge, qasıetti aıda «Ramazan kerýeni» atty qaıyrymdylyq is-sharasy uıymdastyrylady.

«Namaz oqyp úıreneıik», «Quran oqyp úıreneıik», «Qosh keldiń, Ramazan», «30 kúnge 30 ýaǵyz», «Bas ımam minberi» aıdarymen qala meshitteriniń áleýmettik paraqshalarynda onlaın dárister men meshit jamaǵaty arasynda «Rabbym, bilimimdi arttyr» syndy ıntelektýaldy bilim saıystary ótedi», - dedi qalanyń bas ımamy.

Spıker sharıǵat jáne pátýa bólimi bıylǵy pitir sadaqa kólemin 420 teńge etip bekitkenin atap ótti. Bul elimizdegi 2 keli unnyń ortasha baǵasyna saı. Sonymen qatar pitir sadaqasyn meıizben berem degender úshin 3580 teńge, qurmamen eseptese 7 300 teńge. Oraza ustaýǵa densaýlyǵy jaramaıtyn jáne úlken jastaǵy qart kisilerge orazasy úshin fıdııa quny 2500 teńge dep bekitildi.

«Pitir sadaqasyn meshitterge kelip berýmen qatar, Kaspı.kz qosymshasy arqyly da berýge bolady. Qala meshitterinde Kaspıı QR qoıyldy», - dep aqparattandyrdy ımam.