Almatyda tehnıkalyq jáne kásiptik mamandar daıarlaıtyn kolledjderge talaptar kúsheıtildi
Qazaqstan Grezıdenti Qasym-Jomart Toqaev óziniń 2020 jylǵy 1 qyrkúıektegi Joldaýynda qoljetimdi jáne sapaly bilim berýdiń mańyzdylyǵyn erekshe atap ótti. Eńbek naryǵynda talap etiletin quzyretterdi qalyptastyrýǵa kásiptik bilim berýdiń barlyq júıesin qaıta baǵdarlaý máselesine erekshe nazar aýdaryldy.
Óńirlik kommýnıkatsııalar qyzmeti alańynda ótken onlaın brıfıng barysynda Almaty qalasy bilim berý sapasyn qamtamasyz etý departamentiniń basshysy Gúlnar Ermekbaeva 2020 jyldyń 1 qazanyndaǵy jaǵdaı boıynsha Almaty qalasynyń aýmaǵynda tehnıkalyq jáne kásiptik bilim berý baǵdarlamalary boıynsha bilim berý qyzmetine lıtsenzııasy bar 104 bilim berý uıymy tirkelgenin aıtty. Onyń ishinde 35-i memlekettik kolledj, 61-i jekemenshik kolledj.
Almaty qalasynyń tehnıkalyq jáne kásiptik bilim berý uıymdaryndaǵy bar mamandyqtar men biliktilikter boıynsha QR Bilim jáne ǵylym mınıstriniń 2018 jylǵy 27 qyrkúıektegi buıryǵymen bekitilgen 104 kolledjde tehnıkalyq jáne kásiptik, orta bilimnen keıingi bilimniń mamandyqtary men biliktilikteriniń 15 baǵyty boıynsha ruqsattary bar.
Spıker kolledjderdi beıindeýdiń mańyzdylyǵyna jeke toqtaldy.
«Tehnıkalyq jáne kásiptik bilim berýdiń mamandanýy salalyq baǵyttar: tehnıkalyq, tehnologııalyq, aýyl sharýashylyǵy, qurylys jáne kommýnaldyq sharýashylyq jáne taǵy basqa boıynsha naqtylanatyn bolsa, óńirdiń oqý oryndarynda mamandyqtardyń qaıtalanýyn boldyrmaıdy. Tehnıkalyq jáne kásiptik bilimi bar mamandardy daıarlaýǵa memlekettik tapsyrysty bólý kezinde memlekettik tapsyrysty ornalastyrý jónindegi komıssııa músheleri birinshi kezekte kolledjderdi beıindeýge basa nazar aýdarýy tıis», - dedi spıker.
Tehnıkalyq jáne kásiptik bilim berý uıymdarynyń bilim berý qyzmetine qoıylatyn talaptardy arttyrý maqsatynda QR Bilim jáne ǵylym mınıstrligi bıyl shilde aıynda «Bilim berý qyzmetine qoıylatyn biliktilik talaptaryn jáne olarǵa sáıkestikti rastaıtyn qujattardyń tizbesin bekitý týraly» QR Bilim jáne ǵylym mınıstriniń 2015 jylǵy 17 maýsymdaǵy №391 buıryǵyna ózgerister engizdi.
Atap aıtqanda, tehnıkalyq jáne kásiptik bilim berý uıymdarynyń bilim berý qyzmetine qoıylatyn talaptarǵa, mindetti sharttaryna tómendegi tarmaqtar qosyldy:
- qolledjder sońǵy 2 jylda mamandyǵy boıynsha bilim alýshylardy úzdiksiz qabyldaýdy júzege asyrýy qajet;
- mamandyq boıynsha bitirýshilerdiń jalpy sanymen salystyrǵanda jumysqa ornalasqandardyń jáne jumyspen qamtylǵandardyń úlesi 75% - dan kem bolmaýy tıis.
«Atalǵan talaptar kolledjder úshin mamandardy beıindeý jáne daıarlaý turǵysynan sheshim qabyldaýǵa jaqsy yntalandyrý bolady dep úmittenemiz. Búgingi tańda qalanyń 5 kolledji 20 biliktilik boıynsha lıtsenzııaǵa qosymshany qaıtaryp berdi jáne osy másele boıynsha jumysty bizdiń Departament udaıy júrgizetin bolady», - dep qorytyndylady G.Ermekbaeva.
