Almatyda tegin quqyqtyq keńes beretin ortalyq ashyldy

ALMATY. QazAqparat- Eki zańger-praktık jáne bir keńesshi-kómekshi megapolıs turǵyndaryna tegin keńes beredi. Bul týraly óńirlik kommýnıkatsııalar qyzmetiniń brıfınginde Almaty qalasynyń «Eriktiler lıgasy» qoǵamdyq qorynyń dırektory Aqnur Ospanova málim etti, dep habarlaıdy QazAqparat tilshisi.

Almatyda «Zań konsýltatsııalary» jobasy iske qosyldy, sonyń arqasynda kez kelgen adam mamandardyń zań kómegin tegin ala alady.

Úsh aıdyń ishinde zań kómegi oflaın formatta 553 turǵynǵa kórsetildi, 1102 onlaın-konsýltatsııa ótkizildi.

«Bul jobanyń negizgi maqsaty - qıyn ómirlik jaǵdaıǵa tap bolǵan azamattardyń quqyǵyn qorǵaý jáne halyqtyń quqyqtyq bilim deńgeıin arttyrý. Bizdiń zańgerler qabyldaýdy tegin júrgizedi. Joba tanymal bolǵan jaǵdaıda mamandar shtaty keńeıtiledi», - dedi qoǵamdyq qor tóraǵasy.

Kópjyldyq tájirıbesi bar zańgerler azamattar júgingen kezde aýyzsha jáne jazbasha keńester berip qana qoımaı, is materıaldaryn zerdeleýge kómektesedi, sotta ótinish bildirgenderdiń múddesin qorǵaıdy, talap aryz jazýǵa járdemdesedi.

Almatylyqtar Toraıǵyrov kóshesi, № 29 mekenjaıyna habarlasa alady.